ფრაქცია "ევროპული საქართველო - მოძრაობა თავისუფლებისათვის" თავჯდომარე და ეუთოს საპარლამენტო ასამბლეის პრეზიდენტი, გიგი წერეთელი ონლაინ რეჟიმში ევროკომისარ იანეს ლენარჩიჩის ესაუბრა.

როგორც „ინტერპრესნიუსს“ „ევროპული საქართველოდან“ აცნობეს, საუბარი შეეხო კრიზისების მართვას მოცემულ სიტუაციაში და იმ სტრატეგიას, რომელიც აქვს ევროკავშირს არამარტო წევრ ქვეყნებთან, არამედ ზოგადად სამეზობლოში და საქართველოსთან მიმართებით.

მათივე ცნობით, გიგი წერეთელმა თავის გამოსვლაში განსაკუთრებით ხაზი გაუსვა ოკუპირებულ ტერიტორიებზე შექმნილ ვითარებას, ადამიანის უფლებებს და კორონავირუსით გამოწვეულ კრიზისს.

"ძალიან საინტერესო საუბარი გვქონდა ევროკომისარ ლენარჩისთან, რომელიც ხელმძღვანელობს კრიზისების მართვის მიმართულებას ევროკავშირში და ეს ეხებოდა იმ სტრატეგიას, რომელიც აქვს ევროკავშირს დღეს, არამარტო წევრ ქვეყნებთან, არამედ მეზობელ ქვეყნებთანაც, მათ შორის საქართველოსთან დაკავშირებით და განსაკუთრებით ხაზი გავუსვით ვითარებას ოკუპირებულ ტერიტორიებზე - იქ, სადაც მომატებული საფრთხეებია და განსაკუთრებული ყურადღებაა საჭირო“, - განაცხადა გიგი წერეთელმა.