ინფრასტრუქტურის მშენებელთა ასოციაციამ და „თიბისიმ“, როგორც მისმა ასოცირებულმა წევრმა, ერთობლივ ვებინარს უმასპინძლეს თემაზე - ინკოტერმს 2020 - Incoterms 2020. როგორც „ინტერპრესნიუსს“ „თიბისიდან“ აცნობეს, ინკოტერმსი (International Commercial Terms) - საერთაშორისო კომერციული ტერმინები და წესებია, რომლებიც გამოქვეყნებულია საერთაშორისო სავაჭრო პალატის (ICC) მიერ და ფართოდ გამოიყენება საერთაშორისო კომერციულ ოპერაციებში.

„ინკოტერმსის წესები განმარტავს მხარეთა ვალდებულებებს, ხარჯებისა და რისკების გადანაწილებას საქონლის ტრანსპორტირების დროს. 2020 წელს აღნიშნულ წესებში ცვლილება შევიდა და ჩამოყალიბდა ახალი რედაქციის სახით - Incoterms 2020. აღნიშნული ინფორმაცია მნიშვნელოვანია ისეთი კომპანიებისთვის, რომელთა საქმიანობის ნაწილია როგორც ექსპორტი, ასევე იმპორტი. ვებინარს ესწრებოდნენ ინფრასტრუქტურის მშენებელთა ასოციაციის წევრი სამშენებლო კომპანიები, რომლებიც ჩართულები არიან ინფრასტრუქტურული თუ კერძო პროექტების განხორციელებაში და ასევე, სამშენებლო მასალების იმპორტიორი კომპანიები“,- აღნიშნულია ინფორმაციაში.

„თიბისის“ ვაჭრობისა და სტრუქტურული ფინანსირების დეპარტამენტის დირექტორის თამარ ხიზანიშვილის განცხადებით, ვებინარის წარმდგენად „თიბისის“ შერჩევა, ვაჭრობის ფინანსირების მიმართულებით „თიბისის“ გუნდის წარმატებამ განაპირობა.

„ქვეყანაში ვაჭრობის დაფინანსების მიმართულებით, „თიბისის“ ბაზრის წილი 51,2%-ია. წლების განმავლობაში, „თიბისი“ ამ სფეროში, მსოფლიოს მასშტაბით, ყველა ძირითად საერთაშორისო ბანკთან და ფინანსურ ინსტიტუტთან თანამშრომლობს და აღნიშნული პარტნიორობის ფარგლებში, მომხმარებელს უკვე არაერთი პროდუქტი და მომსახურება შევთავაზეთ. საერთაშორისო ფინანსურმა ჟურნალმა - Global Finance „თიბისი“ საქართველოში ვაჭრობის დაფინანსების სფეროში 2020 წლის საუკეთესო პროვაიდერად, Euromoney-მ კი ბაზრის ლიდერად და საუკეთესო მომსახურების მქონე ბანკად დაასახელა“, - განაცხადა „თიბისის“ ვაჭრობისა და სტრუქტურული ფინანსირების დეპარტამენტის დირექტორმა თამარ ხიზანიშვილმა.

„თიბისის“ ცნობით, ვებინარს მოდერატორი - „თიბისის“ ვაჭრობის ფინანსირებისა და დოკუმენტური ოპერაციების ჯგუფის უფროსი - თამარ გუგუშვილი უძღვებოდა, რომელიც 2012 წლიდან აღნიშნული გუნდის წევრია.

„ინფრასტრუქტურის მშენებელთა ასოციაციის წევრი კომპანიების მიერ დაგროვებული ცოდნა და გამოცდილება მნიშვნელოვანი რესურსია, რომლის გაზიარებაც ასოციაციის ერთ-ერთი მთავარი დანიშნულებაა. ამ თვალსაზრისით, განსაკუთრებით მნიშვნელოვანია ისეთი პრეცედენტი, როგორიც ასოციაციის ასოცირებულმა წევრმა - „თიბისიმ“, ამ ვებინარის ორგანიზებით განახორციელა“, - განაცხადა ICCA-ს აღმასრულებელმა დირექტორმა, ანა საბახტარიშვილმა.