დიმიტრი ხუნდაძის განცხადებით, შეზღუდვების შესახებ კანონპროექტში სახალხო დამცველის რეკომენდაციების უდიდესი ნაწილი გაითვალისწინა

ჯანდაცვის კომიტეტის თავმჯდომარის, დიმიტრი ხუნდაძის განცხადებით, შეზღუდვების შესახებ კანონპროექტში სახალხო დამცველის რეკომენდაციების უდიდესი ნაწილი გაითვალისწინა. როგორც ხუნდაძემ ჟურნალისტებს განუცხადა, უკვე წარმოდგენილია სახეცვლილი და დაზუსტებული კანონპროექტი.

"გუშინდელი სასესიო განხილვის შემდეგ შედგა კომუნიკაცია სახალხო დამცველთან, მისი რეკომენდაციების უდიდესი ნაწილი არის გათვალისწინებული, ჩაშლილია ყველა ის დეტალი, სადაც კითხვის ნიშნები იყო და გამოითქვა შენიშვნები სესიაზეც, ასევე რაც ჰქონდა სახალხო დამცველს წარდგენილ წერილში, ჩვენ ეს გავითვალისწინეთ, წარმოდგენილია უკვე სახეცვლილი, ანუ უფრო მეტად დაზუსტებული ვარიანტი კანონპროექტის. რაც შეეხება ვადას, დღეს 11 საათზე გვაქვს საკოორდინაციო საბჭო, სადაც ეპიდემიოლოგებთან ერთად გავივლით, რომ ეს იყოს გონივრული და კანონპროექტმა მთავარ მიზანს მიაღწიოს, რომ რისკები მოსახლეობის დაინფიცირების იყოს მინიმალური", - განაცხადა ხუნდაძემ.

შეგახსენებთ, რომ ომბუდსმენმა პარლამენტს მიაწოდა რეკომენდაციები, რა კრიტერიუმები უნდა იყოს კანონპროექტში გათვალისწინებული, რათა უფლების შეზღუდვა კონსტიტუციურად და ლეგიტიმურად ჩაითვალოს. სახალხო დამცველის აზრით, მნიშვნელოვანია კანონით ნათლად განისაზღვროს მთავრობისათვის/სამინისტროსათვის მინიჭებული უფლებამოსილების ფარგლები და მიეთითოს, რომ შეზღუდვა უნდა იყოს დემოკრატიული საზოგადოებისთვის აუცილებელი, არადისკრიმინაციული, პროპორციულად შემზღუდველი, რათა დაცული სიკეთე აღემატებოდეს შეზღუდვით მიყენებულ ზიანს. ასევე აუცილებელია ყველა შეზღუდვის დასაბუთება და გარკვეული ბუნდოვანი დებულებების განმარტება კანონპროექტში. წერილობით მოსაზრებაში სახალხო დამცველი ხაზს უსვამს სასამართლო კონტროლის მნიშვნელობას. პირველ რიგში აღნიშნულია, რომ მნიშვნელოვანია იზოლაციისა და საკარანტინე ღონისძიების შესახებ გადაწყვეტილების მიღების პროცედურა იყოს მკაფიო, მოთავსებულ პირთა სამართლებრივი დაცვის გარანტიები გაძლიერდეს და შემოღებულ იქნას ეფექტიანი გასაჩივრების მექანიზმი. ასევე, გამომდინარე იქიდან, რომ მთავრობას ამ კანონპროექტით ენიჭება განსაკუთრებული უფლებამოსილებები, მნიშვნელოვანია კანონმდებელმა შექმნას შესაბამისი გარანტიები აღმასრულებელი ხელისუფლების მიერ ადამიანის უფლებებში ჩარევის შემთხვევებზე ეფექტური მართლმსაჯულების განსახორციელებლად (შემცირებული სასამართლო განხილვის ვადების შემოღების გზით). საქართველოს სახალხო დამცველმა წარმოადგინა ასევე მოსაზრებები სისხლის სამართლის საპროცესო კოდექსში განსახორციელებელ ცვლილებებთან დაკავშირებით, რომლის მიხედვითაც მოსამართლეს ენიჭება დისტანციური სასამართლო პროცესების გამართვის შესაძლებლობა. "მიგვაჩნია რომ აუცილებელია კანონპროექტის მოდიფიცირება და მხოლოდ ისეთი სხდომების ჩატარება დისტანციურად, რომელთა გადადებაც გამოუსწორებელ ზიანს გამოიწვევს", - მიიჩნევს სახალხო დამცველი.

გიორგი ანთაძე - საქართველო ვაშინგტონისა და თავისუფალი სამყაროს მთავარი სტრატეგიული პარტნიორია სამხრეთ კავკასიაში და ჩვენ ეს როლი და ფუნქცია ბოლომდე უნდა ავითვისოთ
ქართული პრესის მიმოხილვა 25.01.2021
ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს