ეროვნული ბიბლიოთეკისა და ჰერალდიკის სახელმწიფოს საბჭოს ერთობლივი ონლაინ გამოფენა ეროვნული ბიბლიოთეკის ელექტრონული რესურსების განყოფილების უფროსის, საქართველოს საბიბლიოთეკო ასოციაციის პრეზიდენტის რუსუდან ასათიანის ხელშეწყობით შეიქმნა. ამის შესახებ ინფორმაციას ჰერალდიკის სახელმწიფოს საბჭო ავრცელებს.

მათივე ინფორმაციით, საქართველოს რესპუბლიკის 100 წელმა ასახვა ჰპოვა საქართველოს სახელმწიფო სიმბოლოების ისტორიაში.

„როგორ შეიქმნა სახელმწიფოებრიობის მთავარი იდეა - საქართველოს სახელმწიფო გერბი, ვინ იყო მისი პირველი ავტორი და როგორ ჩამოყალიბდა დღევანდელი სრულყოფილის სახით და დადგინდა. საქართველოს სახელმწიფო დროშის შექმნა, მისი გაუქმება და ხელახლა აღდგენა დამოუკიდებლობის აღდგენასთან ერთად, საბოლოოდ ისტორიული მრავალსაუკუნოვანი დროშის მიკვლევა დასავლეთ ევროპის წიგნსაცავებში და მისი დადგენა სახელმწიფოებრიობის მთავარ ეროვნულ სიმბოლოდ.

სახელმწიფო ჰიმნი, ასევე სახელმწიფოს სხვა მნიშვნელოვანი სიმბოლოები მუნიციპალიტეტების გერბები, სახელმწიფო ჯილდოები, საბრძოლო დროშები შეგიძლიათ იხილოთ ბმულზე https://www.nplg.gov.ge/exhibitions/heraldika, სადაც ასევე წარმოდგენილია ჰერალდიკის სახელმწიფო საბჭოს მასალები: სახელმწიფო სიმბოლოების ესკიზები, კანონები, ისტორიული საზღვაო რუკები და ატლასები, პარლამენტის დადგენილებები... ყველაფერი, რაც სრულყოფილ წარმოდგენას ქმნის საქართველოს დამოუკიდებლობის, სახელმწიფოებრიობის და ჰერალდიკური მემკვიდრეობის შესახებ“,-აღნიშნულია ინფორმაციაში.