„ნაციონალური მოძრაობის“ პოზიცია აბსოლუტურად ლოგიკური და ადეკვატურია, არ მგონია, რომ დანარჩენ ოპოზიციურ პარტიებს გაგვიჭირდეს თბილისის მაჟორიტარებზე შეთანხმების მოძიება, უახლოეს დღეებში შევიკრიბებით და სამომავლოდ კანდიდატების სახელების დონეზეც შეიძლება ჩამოვყალიბდეთ, - ასე ეხმაურება ,,ახალი საქართველოს“ ლიდერი გიორგი ვაშაძე „ნაციონალური მოძრაობის“ გუშინ მიღებულ გადაწყვეტილებას.

გიორგი ვაშაძის აზრით, „ნაციონალური მოძრაობის“ გუშინდელი განცხადება ოპოზიციურ პარტიებს შორის შეთანხმებისთვის წინგადადგმული ნაბიჯია. ,,ვფიქრობ, რომ მაჟორიტარებზე შეთანხმების ნაწილში პრობლემები აღმოფხვრილია, „ნაციონალური მოძრაობის“ გუშინდელი განცხადება შეთანხმებისთვის წინ გადადგმული ნაბიჯია. რეგიონებთან დაკავშირებით სერიოზული კვლევები გვჭირდება, არის სპეციფიური რაიონები სადაც ჯობია პირიქით, რამდენიმე ოპოზციური კანდიდატი დავაყენოთ. 8 მარტს გადავდგით დიდი ნაბიჯი, შემდეგ კიდევ ერთი ნაბიჯი როდესაც პოლიტპატიმრები გამოვუშვით და ახლა კიდევ ერთი ნაბიჯი უნდა გადავდგათ წინ. არსებობს პრობლემები, ბევრი პოლიტიკური პარტიაა, მაგრამ საბოლოო ჯამში მაინც ვთანხმდებით,” - განაცხადა გიორგი ვაშაძემ.

შეგახსენებთ, რომ „ნაციონალური მოძრაობის“ პოლიტსაბჭოს თავმჯდომარის ნიკა მელიას განცხადებით, პარტია თბილისის 8 მაჟორიტარული ოლქიდან 6 ოლქს თმობს და მაჟორიტარობის კანდიდატებს მხოლოდ სამგორსა და გლდანში წარადგენს.

იხილეთ ვიდეო