ჰონგ-კონგში, ანტისამთავრობო აქციების წლისთავის აღსანიშნავად გამართულ დემონსტრაციაზე, სამართალდამცავებმა აქციის 53 მონაწილე დააკავეს, - ამის შესახებ ინფორმაციას „როიტერსი“ ავრცელებს.
სააგენტოს ცნობით, საპროტესტო აქციაზე ასობით ადამიანი შეიკრიბა და მათ დასაშლელად სამართალდამცავებმა ცრემლსადენი გაზი და ე.წ. „წიწაკის სპრეი“ გამოიყენეს. ადგილობრივი პოლიციის ინფორმაციით, აქციის დროს 36 მამაკაცი და 17 ქალი დააკავეს. ჰონგ-კონგში საპროტესტო აქციების გაართვა მომავალ დღეებშიც იგეგმება.
შეგახსენებთ, 28 მაისს ჩინეთის პარლამენტმა ჰონგ-კონგისთვის გათვალისწინებული უსაფრთხოების ახალი კანონი დაამტკიცა. კანონმდებლობის მოწინააღმდეგეები აცხადებენ, რომ უსაფრთხოების ახალი კანონი, შესაძლოა, ჰონგ-კონგის უნიკალური სტატუსის დასასრულს ნიშნავდეს. მათივე განმარტებით, ახალი კანონის ფარგლებში ჩინეთმა ჰონგ-კონგში, შესაძლოა, საკუთარი უსაფრთხოების სააგენტოები შექმნას. ახალი კანონი ძალაში სავარაუდოდ, აგვისტოდან შევა.