ზუგდიდში ნარკოდანაშაულისთვის დაკავებულ სასულიერო პირს გიგა ქავთარაძეს საპროცესო შეთანხმება გაუფორმდა. ამის შესახებ „ინტერპრესნიუსს" დაკავებულის ადვოკატმა ჯიტა გულუამ განუცხადა. მისივე ინფორმაციით, ქავთარაძესთან დაკავშირებით, საპროცესო შეთანხმება 5 წლით პატიმრობას, სამწლიან პირობით მსჯავრს და 5000 ლარის ოდენობით ჯარიმას გულისხმობს. ამავე ცნობით, საპროცესო შეთანხმება გაუფორმდა სასულიერო პირთან ერთად დაკავებულ რომან მალანიასაც. აღნიშნული გადაწყვეტილების თანახმად, მალანიას 6 - თვიანი პატიმრობა, 3 წელი პირობითი მიესაჯა, ხოლო ჯარიმის სახით 2 000 ლარის გადახდა მოუწევს.

აღნიშნული პირები, სამართალდამცავებმა გასული წლის დეკემბერში დააკავეს.

ფაქტზე გამოძიება სს კოდექსის 260-ე მუხლის მესამე და მეექვსე ნაწილებით მიმდინარეობდა, რაც თავისუფლების აღკვეთას რვიდან ოც წლამდე ვადით ან უვადო თავისუფლების აღკვეთას ითვალისწინებდა.