ადვოკატ ლევან სამუშიას განცხადებით, „მთავარი არის" ბრალდებული მეწილის გიორგი რურუას ბრალდების საქმეზე დაცვის მხარის მტკიცებულებების გამოკვლევა იწყება. როგორც ადვოკატმა პროცესის დაწყებამდე ჟურნალისტებს განუცხადა, დღევანდელ პროცესზე წარადგენენ მოწმეებს, რომლებიც მათთვის ცნობილ ინფორმაციას მიაწოდებენ სასამართლოს. ლევან სამუშიას თქმით, ამ მოწმეების პროცესზე გამოკითხვა მნიშვნელოვანია იმ მხრივ, რომ მათ იციან, გიორგი რურუა პოლიტიკურ პროცესებში აქტიურად ერთვებოდა, ყოველდღე დადიოდა აქციებზე და მოწმეებიც აქედან გამომდინარე ისაუბრებენ.

ამასთან, ადვოკატის თქმით, ასევე დასაკითხი არიან პოლიციელები და ის გამომძიებელი, რომელმაც საქმეზე ძიება დაიწყო. ადვოკატის თქმით, რურუას საქმე თავიდან ბოლომდე გაყალბებულია და მისი ციხეში ყოფნა, პოლიტიკური გადაწყვეტილებაა.

„პირდაპირ შეიძლება ითქვას, რომ არაერთი ადამიანი უნდა იქნას პასუხისგებაში მიცემული იმ გაყალბების გამო, რაც გიორგი რურუას მიმართებაში გაკეთდა და რაც საქმის მასალებით დასტურდება", -განაცხადა სამუშიამ.