სახელმწიფო ინსპექტორი - აქტიურად ჩავერთვებით საგამოძიებო და საპროკურორო უფლებამოსილებების გამიჯვნის რეფორმის პროცესში, რაც დაჩქარებას საჭიროებს
აქტიურად ჩავერთვებით საგამოძიებო და საპროკურორო უფლებამოსილებების გამიჯვნის რეფორმის პროცესში, რაც ვფიქრობთ, რომ დაჩქარებას საჭიროებს, - ამის შესახებ სახელმწიფო ინსპექტორმა საქართველოს პარლამენტში ანგარიშის წარდგენისას განაცხადა. თოლორაიას თქმით, არსებული კანონმდებლობა გამომძიებლებს საგამოძიებო მოქმედებების დამოუკიდებლად ჩატარების შესაძლებლობას არ აძლევს და მათ არ აქვთ გადაუდებლად ვიდეოჩანაწერების გამოთხოვის უფლება, „მაშინ როდესაც თითოეული წუთი შეიძლება გადამწყვეტი იყოს.“
,,არსებული კანონმდებლობა გამომძიებელს არ აძლევს საგამოძიებო მოქმედებების დამოუკიდებლად ჩატარების შესაძლებლობას. კერძოდ, გამომძიებელს კანონით არ აქვს მინიჭებული ისეთი უმნიშვნელოვანესი საგამოძიებო მოქმედებების ჩასატარებლად სასამართლოდან ნებართვის ასაღებად მიმართვის უფლება, როგორიც არის - ჩხრეკა, ამოღება, დათვალიერება, ვიდეოჩანაწერებისა და დოკუმენტების გამოთხოვა, ოპერატიულ-სამძებრო ღონისძიებების განხორციელება. უფრო მეტიც, გამომძიებელს არ აქვს გადაუდებლად მაგალითად, ვიდეოჩანაწერების გამოთხოვის უფლება, მაშინ როცა თითოეული წუთი შეიძლება იყოს გადამწყვეტი. ჩვენ აქტიურად ჩავერთვებით საგამოძიებო და საპროკურორო უფლებამოსილებების გამიჯვნის რეფორმის პროცესში, რაც ვფიქრობთ, რომ დაჩქარებას საჭიროებს," - აღნიშნა ლონდა თოლორაიამ.
