თქვენ მიგაჩნიათ, რომ 30 მაჟორიტარი უფრო ეფექტური იქნება და უფრო პასუხობს მაჟორიტარული პრინციპის საჭიროებას, ვიდრე 73 მაჟორიტარი, თუ ეს არის უბრალოდ გარიგება გარიგებისთვის, რომ რაღაც პოლიტიკური შეთანხმება მოხდეს? - ასე მიმართა ფრაქცია „დამოუკიდებელი დეპუტატების“ წევრმა გედევან ფოფხაძემ საპარლამენტო უმრავლესობის წევრებს იურიდიულ საკითხთა კომიტეტის სხდომაზე, სადაც საარჩევნო სისტემის ცვლილების შესახებ კონსტიტუციური კანონის პროექტის განხილვა მიმდინარეობს.

როგორც ფოფხაძემ აღნიშნა, მიუხედავად იმისა, რომ მისთვის მაჟორიტარული სისტემა უფრო მისაღებია, ის დაუჭერს მხარს საკონსტიტუციო ცვლილებებს.

„მე მაინტერესებს მომხსენებლისა და ავტორების პოზიცია მაჟორიტარულ ოლქების რაოდენობასთან დაკავშირებით, ჩვენ ვაძლევთ ხმას. პირდაპირ გეუბნებით, რომ უფრო მეტად მომწონს მაჟორიტარული სისტემა, ვიდრე პროპორციული. ეს პოზიცია მქონდა და ამ პოზიციას ყოველთვის ვაფიქსირებდი, მაგრამ ახლა არის გარკვეული პოლიტიკური რეალობა და ამ პოლიტიკურ რეალობაში საჭიროა ისეთი გადაწყვეტილებების მიღება, რომელიც ადეკვატური იქნება ამ რეალობისთვის. თქვენ მიგაჩნიათ, რომ 30 მაჟორიტარი უფრო ეფექტური იქნება და უფრო პასუხობს მაჟორიტარული პრინციპის საჭიროებას, ვიდრე 73 მაჟორიტარი თუ ეს არის უბრალოდ გარიგება გარიგებისთვის, რომ რაღაც პოლიტიკური შეთანხმება მოხდეს? ამავდროულად, მინდა პირდაპირ გკითხოთ, რომ მაშინ რატომ არ უნდა მიგვეღწია შეთანხმება იმაზე, რომ ყოფილიყო სულ პროპორციული, თუ 30 მაჟორიტარის დატოვება არის შეღავათი ვიღაცებისთვის? მე მინდა ავტორებმა პოლიტიკური მოტივაციები უფრო გასაგებად გვითხრან”, - განაცხადა ფოფხაძემ.