საქართველოს ხელისუფლების პოლიტიკა მიმართულია სწორედ სამშვიდობო ინიციატივების განხორციელებაზე, თავიანთ საცხოვრებელ ადგილებში დევნილთა უსაფრთხო და ღირსეულ დაბრუნებაზე, - ამის შესახებ აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ განაცხადა.

აბაშიძის თქმით, აფხაზეთის ავტონომიური რესპუბლიკის მთავრობა იმედოვნებს, რომ ერთობლივი ძალისხმევით შესაძლებელი იქნება უსამართლობის დარეგულირება და სამართლებრივი სტატუს ქვოს აღდგენა.

„20 ივნისი გაეროს მიერ ლტოლვილთა მსოფლიო დღედ არის გამოცხადებული. დღევანდელ დღეს, საერთაშორისო დონეზე, განსაკუთრებული ყურადღება ექცევა იმ კატეგორიის ადამიანებს, რომელთაც საკუთარ თავზე უსამართლობა, საკუთარი საცხოვრებელი ადგილებიდან განდევნა და საერთაშორისოდ აღიარებული ნორმების დარღვევა გამოსცადეს. ამ დღეს, მთელი ცივილიზებული სამყარო განსაკუთრებით ხაზს უსვამს დევნილი და იძულებით გადაადგილებული პირების უფლებების დაცვის და სამართლიანობის აღდგენის აუცილებლობას.

საქართველოს ხელისუფლების პოლიტიკა მიმართულია სწორედ სამშვიდობო ინიციატივების განხორციელებაზე, თავიანთ საცხოვრებელ ადგილებში დევნილთა უსაფრთხო და ღირსეულ დაბრუნებაზე.

აფხაზეთის ავტონომიური რესპუბლიკის მთავრობა უერთდება საერთაშორისო საზოგადოების განწყობას და საქართველოს ხელისუფლების მიდგომას დევნილთა პრობლემების მოგვარების მცდელობებთან დაკავშირებით და იმედოვნებს, რომ ერთობლივი ძალისხმევით, არსებული სამშვიდობო პოლიტიკის პირობებში საერთაშორისო მექანიზმების ეფექტური გამოყენების მეშვეობით, შესაძლებელი იქნება უსამართლობის დარეგულირება და სამართლებრივი სტატუს-კვოს აღდგენა“ - განაცხადა რუსლან აბაშიძემ.

აღნიშნულ ინფორმაციას აფხაზეთის ავტონომიური რესპუბლიკის მთავრობა ავრცელებს.