სომხეთის პარლამენტში მმართველი ბლოკის ორ დეპუტატს კორონავირუსი დაუდასტურდა.

მე კორონავირუსი მაქვს, მაგრამ ახლა თავს კარგად ვგრძნობ, სიცხე ქვემოთ მიწევს. ამის შესახებ „NEWS.am“-ს სომხეთის პარლამენტის მმართველი ბლოკის „ჩემი ნაბიჯის“ წევრმა დეპუტატმა კრისტინე პოღოსიანმა განუცხადა.

მისი თქმით, შოკი განიცადა, რადგან ყოველთვის ძალიან ფრთხილობდა და დეპუტატებთან ბოლო პერიოდში ნიღბის გარეშე კონტაქტი არ ჰქონია.

კორონავირუსი გამოუვლინდა კიდევ ერთ დეპუტატს ამავე ბლოკიდან ვიქტორ ენგიბარიანს.

„გუშინ ჩავაბარე ტესტი, რომელიც დადებითი აღმოჩნდა. ჯანმრთელობის არავითარი პრობლემა არ მაქვს. სახლში თვითიზოლაციაში ვარ. როგორც ჩანს, რაღაც მომენტში უყურადღებოდ ვიყავი, არასათანადოდ ვიცავდი ყველა წესს. ყველას გთხოვთ - ატარეთ ნიღაბი და დაიცავით ყველა წესი. ამას შეუძლია გადაარჩინოს ადამიანთა სიცოცხლე, მათ შორის, თქვენთვის ახლობელი ადამიანების“, - წერს „ფეისბუკში“ სომხეთის პარლამენტის დეპუტატი.