ეგზიტპოლების შედეგების თანახმად, პოლონეთში საპრეზიდენტო არჩევნების მეორე ტური გაიმართება, სადაც მოქმედი პრეზიდენტი ანჯეი დუდა და ვარშავის მერი რაფალ ტრჟასკოვსკი დაუპირისპირდებიან ერთმანეთს, - ამის შესახებ ინფორმაციას „ევრონიუსი“ ავრცელებს.
გამოცემის ცნობით, კვლევითი ორგანიზაცია IPSOS-ის მიერ წარდგენილი შედეგების მიხედვით, ანჯეი დუდამ პირველ ტურში ხმების 41.8% მიიღო, მისმა მთავარმა მეტოქემ, რაფალ ტრჟასკოვსკიმ კი - 30.4%.
არჩევნების მეორე ტური 12 ივლისს გაიმართება.
ცნობისათვის, პოლონეთში საპრეზიდენტო არჩევნები გუშინ გაიმართა. არჩევნებში ამომრჩეველთა აქტივობამ 62.4% შეადგინა.