რუსეთის საგარეო საქმეთა სამინისტროს განცხადება არის მცდელობა, რომ რუსეთისადმი რაღაცა საფრთხის ილუზია შექმნას იმით, რასაც თავად საყოფაცხოვრებო გადაცდომებად მოიხსენიებდა ხოლმე, - ამის შესახებ პარლამენტის პირველმა ვიცე-სპიკერმა გია ვოლსკიმ ჟურნალისტებს განუცხადა, რითაც გამოეხმაურა რუსეთის საგარეო უწყების მიერ გავრცელებულ განცხადებას.

ვოლსკის შეფასებით, რუსეთის რიტორიკა მნიშვნელოვნად შეცვლილია და განსაკუთრებული ყურადღება მართებს არამხოლოდ საქართველოს, არამედ მის პარტნიორ ქვეყნებსაც.

„მნიშვნელოვნად შეცვლილია რიტორიკა და მაღალ პოლიტიკურ დონეზეა აყვანილი. აქედან გამომდინარე, შემაშფოთებელია, როცა ოკუპანტი, თავად საერთაშორისო კანონების დამრღვევი მხარე, ამ დონის პოლიტიკურ მნიშვნელობას ანიჭებს ე.წ. საოკუპაციო ხაზის დარღვევას, რასაც ადრე საყოფაცხოვრებო ფორმატში განიხილავდა. იგი ამერიკის შეერთებული შტატებისა და საქართველოს რაღაც პოლიტიკურ გაერთიანებას რუსეთის წინააღმდეგ განიხილავს. ეს არის მცდელობა, რომ შიდა სერიოზული პრობლემები გარეთ გამოიტანოს და რუსეთისადმი რაღაცა საფრთხის ილუზია შექმნას იმით, რომ ვთქვათ, მონადირე დააკავეს დაღესტანში და საოკუპაციო ხაზი გადაკვეთა ადამიანმა. ეს განცხადებები ზედ ერთვის ლუგარის ლაბორატორიის შესახებ განცხადებებს. ანუ პოლიტიკურ ასპექტებზე მიუთითებს მაშინ, როდესაც ეს თემები ყოველდღიურ, საყოფაცხოვრებო გადაცდომებად ჰქონდა ადრე მოხსენიებული. აქედან გამომდინარე, განსაკუთრებული ყურადღება მართებს არამხოლოდ საქართველოს, არამედ მის პარტნიორ ქვეყნებს: აშშ-ს, ევროკავშირს და ა. შ. საკმაოდ სერიოზული დიპლომატიური აქციებია საჭირო ამასთან დაკავშირებით,“ - განაცხადა ვოლსკიმ.

ცნობისთვის, რუსეთის საგარეო საქმეთა სამინისტრომ განცხადება გაავრცელა, სადაც შეშფოთებას გამოთქვამს საქართველოს მხრიდან რუსეთის საზღვრის, ასევე ე.წ. სამხრეთ ოსეთისა და აფხაზეთის საოკუპაციო ხაზების გადაკვეთის ფაქტების გახშირების გამო. განცხადებაში რუსეთის საგარეო უწყება საქართველოს მოუწოდებს, „შეწყვიტოს პროვოკაციული ქმედებები და განცხადებები“.