ფეხბურთელ გიორგი შაქარაშვილის საქმეზე მოწმის სახით გამოკითხული ვახტანგ ახვლედიანი ბრალდებული მორაგბეების ადვოკატებთან, ალექსანდერე კობაიძესთან და ვასილ მამულაშვილთან გამოკითხვაზე მისვლას არ აპირებს. აღნიშნულის შესახებ "ინტერპრესნიუსს" ახვლედიანის ადვოკატმა, კახა წერეთელმა განუცხადა. როგორც ის განმარტავს, მას ადვოკატები დაუკავშირდნენ და ახვლედიანის გამოკითხვაზე მისვლა სთხოვეს.

"ეს არის ნებაყოფლობითი განმარტების მიცემა. შესაბამისად, ჩემი დაცვის ქვეშ მყოფს სწორად არ მიაჩნია, მან განმარტება მისცეს ადვოკატებს. ეს არ არის „კაპრიზი“, ისინი არიან ბრალდებულების ადვოკატები, ხოლო ახვლედიანი საქმეში დაზარალებულია, შესაბამისად, მეორე მხარე პროცესუალური მოწინააღმდეგეა. არ მიგვაჩნია სწორად, რომ პროცესუალურ მოწინააღმდეგეს განმარტებები მივცეთ", - აცხადებს წერეთელი.

კითხვაზე, თუკი, მისი დაცვის ქვეშ მყოფს სასამართლოში დაიბარებენ, მისცემს თუ არა ჩვენებას, წერეთელი პასუხობს, რომ თუკი, სასმართლო ამას საჭიროდ ჩათვლის, ახვლედიანი იქ გამოცხადდება.

"ეს მათი უფლებაა. თუ სასამართლო გადაწყვეტს, რომ არსებობს ახვლედიანის დაკითხვის აუცილებლობა, ბუნებრივია, ის სასამართლოში გამოცხადდება", - აცხადებს წერეთელი.

ცნობისთვის, ვახო ახვლედიანი არაგვის ხიდის მიმდებარედ მომხდარი ინციდენტისას გიორგი შაქარაშვილთან, კოკო ღიბრაძესთან, იაკობ ბრეგვაძესთან, გიორგი ქათამაძესთან და გური ამირხანაშვილთან ერთად იმყოფებოდა.