დანიური Danfoss-ი საქართველოში ინჟინრების გადამზადების ტრენინგებს დააფინანსებს. ამის შესახებ ინფორმაციას ეკონომიკისა და მდგარი განვითარების სამინისტრო ავრცელებს.
მათივე ინფორმაციით, საინჟინრო კადრების მომზადება - გადამზადების პროგრამა ქართველ ახალგაზრდებს საშუალებას მისცემს დაეუფლონ თანამედროვე ტექნოლოგიებს და სტაჟირება დანიური კომპანიის „Danfoss“ - ის საწარმოებში გაიარონ.
„Danfoss“ - ი ცნობილი და ტრადიციული კომპანიაა. მას შემდეგ, რაც კომპანიაში შეიტყვეს, რომ საქართველო ახორციელებს ენერგეტიკულ რეფორმას და მიღებულია კანონი ენერგოეფექტურობის შესახებ, სურვილი გამოხატეს, უახლოეს მომავალში თავისი წარმომადგენლები გამოაგზავნონ და ინვესტიციის განხორციელებისა და წარმოების გადმოტანაზე გადაწყვეტილების მიღებამდე, დააფინანსონ ტრენინგები ქართველი ინჟინრებისთვის. აღნიშნული კადრები მომავალში შესაძლოა, „Danfoss“ - ის საწარმოში დასაქმდნენ,“ - განაცხადა ეკონომიკისა და მდგრადი განვითარების მინისტრმა ნათია თურნავამ კომპანია „Danfoss”-სის ტოპ-მენეჯმენტთან ონლაინ-შეხვედრის დასრულების შემდეგ.
მინისტრის განცხადებით, დანიური კორპორაციის წარმომადგენლები საქართველოს ეწვევიან და ადგილზე გაეცნობიან ქვეყნის ეკონომიკურ და საინვესტიციო პოტენციალს, თუმცა მანამდე „Danfoss“ - ი, საქართველოს ტექნიკურ უნივერსიტეტთან თანამშრომლობით, თანამედროვე ტექნოლოგიების კვლევითი ლაბორატორიის გახსნა გადაწყვიტა, რომელიც ქართველ ახალგაზრდა ინჟინრებს გადაამზადებს.