აშშ-ის სენატის საშინაო უსაფრთხოებისა და მთავრობის საკითხთა კომიტეტმა ერთხმად დაუჭირა მხარი კანონპროექტის მიღებას, რომელიც ამერიკის ფედერალურ თანამშრომლებს სახელმწიფოს მიერ გაცემულ მოწყობილობებში TikTok-ის აპლიკაციის გამოყენებას აუკრძალავს.

კანონპროექტის ინიციატორი „რესპუბლიკელი“ სენატორი ჯოშ ჰოულია. „როიტერის“ ინფორმაციით, ჩინეთის კუთვნილებაში არსებული სოციალური ვიდეოპლატფორმა TikTok, რომელიც ამერიკელ ახალგაზრდებში პოპულარულია, აშშ-ის კანონმდებლების მხრიდან ბოლო დროს ყურადღების ცენტრში მოექცა.

ამერიკელი კანონმდებლები ჩინურ აპლიკაცია TikTok-ის მომხმარებელთა პერსონალური მონაცემების უსაფრთხოებასთან დაკავშირებით უკმაყოფილებას გამოხატავენ და აცხადებენ, რომ შეშფოთებულები არიან ჩინეთის კანონებით, რომელიც ადგილობრივი კომპანიებისგან „სადაზვერვო საქმიანობაში დახმარებასა და თანამშრომლობას“ ითხოვს.

ორი კვირის წინ აშშ-ის სახელმწიფო მდივანმა მაიკ პომპეომ განაცხადა, რომ შეერთებული შტატები ქვეყანაში ჩინური აპლიკაციების, მათ შორის TikTok-ის, აკრძალვის საკითხს განიხილავს.

ცნობისათვის, ჩინეთსა და აშშ-ს შორის ურთიერთობა კორონავირუსის პანდემიის ფონზე კიდევ უფრო დაიძაბა. აშშ-ის პრეზიდენტი დონალდ ტრამპი ჩინეთს კორონავირუსის შესახებ რეალური ინფორმაციის დამალვაში ადანაშაულებს. უკვე დიდი ხანია აშშ მის მოკავშირეებს მოუწოდებს, რომ 5G სისტემების დანერგვისას ჩინური კომპანიის Huawei-ის აღჭურვილობაზე უარი თქვან. მიზეზად აშშ ასახელებს იმას, რომ ჩინეთმა შეიძლება, საკუთარი კომპანია შპიონაჟისთვის გამოიყენოს.