ჯანდაცვის მსოფლიო ორგანიზაციის (WHO) ხელმძღვანელი აცხადებს, რომ აშშ-ის სახელმწიფო მდივნის, მაიკ პომპეოს განცხადებები, სადაც ის მის დამოუკიდებლობას კითხვის ნიშნის ქვეშ აყენებს, სიმართლეს არ შეესაბამება და ვერ აიძულებს ორგანიზაციას, კორონავირუსთან ბრძოლის საქმიდან გადაუხვიოს.

„ეს კომენტარები არასწორი, მიუღებელი და უსაფუძვლოა. მთლიანად ორგანიზაცია ორიენტირებულია სიცოცხლეების გადარჩენაზე და ჯანმო არ გადაუხვევს მის ვალდებულებებს. ჩვენ ასევე არ გვინდა, რომ საერთაშორისო საზოგადოებამ გადაუხვიოს ამ ვალდებულებებს“, - განაცხადა ჯანმო-ს გენერალურმა დირექტორმა ტედროს ადჰანომ გებრეიესუსმა.

შეგახსენებთ, აშშ-ის სახელმწიფო მდივანმა მაიკ პომპეომ დიდ ბრიტანეთში ვიზიტის დროს განაცხადა, რომ ჯანდაცვის მსოფლიო ორგანიზაციის გენერალური დირექტორი ჩინეთმა „იყიდა“ და ამის გამო უამრავი ბრიტანელი დაიღუპა.