"მთავარი არხის" ერთ-ერთი მეწილის, გიორგი რურუას ბრალდების სისხლის სამართლის საქმეზე დაცვის მხარე ამ წუთებში სასამართლოში დასკვნით სიტყვას წარმოთქვამს. როგორც პროცესის დაწყებამდე ჟურნალისტებს გიორგი რურუას ადვოკატმა, დიმიტრი საძაგლიშვილმა განუცხადა, სასამართლო იმ გადაწყვეტილებას მიიღებს, რასაც მას დაუკვეთავენ.

"დარწმუნებული ვარ, აქამდეც ყველასთვის აშკარა იყო, რომ გიორგი რურუა აქეთ არის დანაშაულის მსხვერპლი და მას იარაღი პოლიციელებმა ჩაუდეს. თუმცა, დღევანდელი დასკვნითი სიტყვის შემდეგ არავითარი კითხვის ნიშანი არ დარჩება ამასთან დაკავშირებით. რაც შეეხება მოლოდინს, ვერანაირი მოლოდინი ვერ მექნება, რადგან გიორგი რურუა ციხეში პოლიტიკური გადაწყვეტილების საფუძველზე იმყოფება, მოსამართლის გადაწყვეტილება მხოლოდ ფორმალური ნაწილია ამ საქმის, რა პოლიტიკური დაკვეთაც იარსებებს, ის პოლიტიკური გადაწყვეტილება იქნება მიღებული. წინასწარ შეუძლებელია ადვოკატმა განსაზღვროს, თუ რა პოლიტიკურ გადაწყვეტილებას მიიღებს სასამართლო. ცალსახად შემიძლია ვთქვა, ძალიან ცუდია, როცა ქვეყანაში პოლიტიკური პატიმრები არსებობენ, ხელისუფლების მხრიდან სასამართლოს და პროკურატურის გამოყენება ხდება პოლიტიკური მოტივაციით", - აცხადებს საძაგლიშვილი.

დასკვნითი სიტყვის წარმოთქმის შემდეგ, საბოლოო სიტყვით ისარგებლებს ბრალდებული რურუა, რის შემდეგაც მოსამართლე სათათბიროდ გავა. უცნობია, გადაწყვეტილება დღესვე გახდება თუ არა ცნობილი.