საერთო სამაგისტრო გამოცდა პირველ აგვისტოს დაიწყება და 4 აგვისტოს დასრულდება. გამოცდაზე 12 600-ზე მეტი მაგისტრობის კანდიდატია დარეგისტრირებული. ამის შესახებ ინფორმაციას შეფასებისა და გამოცდების ეროვნული ცენტრი ავრცელებს.

მათივე ცნობით, დეტალური ინფორმაცია ტესტირების ჩატარების ადგილისა და დროის შესახებ მითითებულია საგამოცდო ბარათზე. მნიშვნელოვანია, რომ ყველა მონაწილე დროულად გამოცხადდეს საგამოცდო ცენტრში პირადობის დამადასტურებელი დოკუმენტითა და საგამოცდო ბარათით. დაგვიანებული გამოცდაზე აღარ დაიშვება.

„გამოსაცდელთა უსაფრთხოების დაცვის მიზნით 2020 წლის გამოცდებზე დაცულია რეკომენდაციები, რომლებიც შეიმუშავა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრომ.

წინა წლებისგან განსხვავებით 2020 წელს საერთო სამაგისტრო გამოცდაზე რეგისტრირებულები მხოლოდ ერთი ტიპის ტესტს აბარებენ, რაც სრულად მოხსნის საგანმანათლებლო პროგრამების არჩევასა და მობილობასთან დაკავშირებულ პრობლემებს.

საერთო სამაგისტრო გამოცდის ჩაბარების შემდეგ მაგისტრობის კანდიდატები სპეციალობის გამოცდას უშუალოდ უმაღლეს სასწავლებლებში ჩააბარებენ,“ - აცხადებენ შეფასებისა და გამოცდების ეროვნულ ცენტრში.