თბილისში, სამგორის რაიონში ორი კორპუსი აფეთქებას გადაურჩა,- აღნიშნულის შესახებ "ინტერპრესნიუსს“ „თბილისი ენერჯიდან“ აცნობეს.

კომპანიის ინფორმაციით, სამგორის რაიონში, აბაშიშვილის ქუჩის ერთ-ერთი კორპუსიდან 114- ში შევიდა შეტყობინება, რომ სადარბაზოში ძლიერი გაზის სუნი იგრძნობოდა.

„"თბილისი ენერჯის" სწრაფი რეაგირების სამსახურის თანამშრომლების ადგილზე მისვლისას, ერთ-ერთ დაკეტილ ბინასთან ლაზერულმა აპარატმა გაზის კონცენტრაცია დააფიქსირა. ბინის მეპატრონე ქალაქიდან გასული იყო. უსაფრთხოების მიზნით, კორპუსს გაზის მიწოდება შეუწყდა, კონკრეტულ ბინაში კი მაშველები აივნიდან შევიდნენ, რის შემდეგაც სამზარეულოში, გაზქურაზე გაზის ონკანი გახსნილ მდგომარეობაში აღმოაჩინეს“, - აღნიშნულია „თბილისი ენერჯის“ მიერ გავრცელებულ ინფორმაციაში.

რაც შეეხება მეორე შემთხვევას, სადარბაზოში გაზის სუნის შესახებ შეტყობინება აქაც "თბილისი ენერჯის" სწრაფი რეაგირების სამსახურის ნომერზე შევიდა.

კომპანიის ინფორმაციით, "თბილისი ენერჯის" სპეციალისტების ადგილზე მისვლისას აღმოჩნდა რომ ერთ - ერთ მობინადრეს გაზქურიდან ჩახსნილი ჰქონდა მილი, რომელიც ღია მდგომარეობაში იყო დატოვებული და გაზი ჟონავდა, თავად კი სახლში იმყოფებოდნენ. ასევე, აღნიშნულ ბინაში აღმოჩნდა კუსტარულად დამონტაჟებული გაზგაყვანილობა.

„კორპუსში მცხოვრებლები აფეთქებას გადაურჩნენ ყურადღებიანი მეზობლების წყალობით, რომლებმაც ოპერატიულად შეატყობინეს გაზის გაჟონვის შესახებ "თბილისი ენერჯის".

"თბილისი ენერჯი" გაფრთხილებთ დაიცავით გაზის უსაფრთხო მოხმარების წესები, ნუ დატოვებთ გაზის დანადგარებს უყურადღებოდ რადგან უსაფრთხოების წესების დარღვევა შესაძლოა მძიმე შედეგებით დასრულდეს რაც საფრთხეს უქმნის როგორც თქვენს ოჯახს ისე მეზობლებს“, - აღნიშნულია გავრცელებულ ინფორმაციაში.