ჩვენ სრულ გარანტიას ვიძლევით, რომ არჩევნებს დემოკრატიულად ჩავატარებთ, - ამის შესახებ ეკონომიკისა და მდგრადი განვითარების მინისტრმა, ნათია თურნავამ განაცხადა.
„ჩვენ სრულ გარანტიას ვიძლევით, რომ არჩევნებს დემოკრატიულად ჩავატარებთ. კორუფციის თვალსაზრისით ერთ-ერთი ყველაზე ტრანსფარენტული ქვეყანა ვართ, რაც არაერთხელ ასახულა საერთაშორისო რეიტინგებში. რაც შეეხება ნებისმიერი მაღალი რანგის აქტს, რაც მიღებულია დღემდე ან მიიღება აშშ-ს სხვადასხვა სტრუქტურაში, იქ პირველ რიგში ასახულია ის პროგრესი, რაც გვაქვს ჩვენს სტრატეგიულ პარტნიორთან ურთიერთობაში“, - განაცხადა ნათია თურნავამ.
შეგახსენებთ, აშშ-ს წარმომადგენელთა პალატამ მხარი დაუჭირა დოკუმენტს, რომლის სახელწოდებაა „2021 წლის ფისკალური წლის ეროვნული თავდაცვის ავტორიზაციის აქტი“, ერთ-ერთ თავში სახელწოდებით - „საქართველოს რესპუბლიკის ხელისუფლების მიერ განხორციელებული რეფორმების მხარდაჭერის შესახებ ანგარიში“ მოიცავს პუნქტს, რომლის თანახმადაც, აშშ-მა მხარი უნდა დაუჭიროს საქართველოს რესპუბლიკის მთავრობას დემოკრატიული ღირებულებების მიმდინარე განვითარებაში, საარჩევნო რეფორმების და კორუფციასთან ბრძოლის გზაზე და ძალისხმევაში, რომ საქართველოს კერძო სექტორმა შეასრულოს საერთაშორისოდ მიღებული სტანდარტები, მათ შორის უცხოური პირდაპირი ინვესტიციების მიღებისა და დაცვის სახით.