ბელარუსის პრეზიდენტი ალექსანდრე ლუკაშენკო სამხედროებს ტერიტორიული მთლიანობის დასაცავად უმკაცრესი ზომების მიღებისკენ მოუწოდებს.

“მოგიწოდებთ, მიიღოთ უმკაცრესი ზომები ბელარუსის ტერიტორიული მთლიანობის დასაცავად,“- განაცხადა ლუკაშნკომ გროდნოს მახლობლად მდებარე სამხედრო საწვრთნელ ბაზაზე სტუმრობისას.

ლუკაშენკო მიიჩნევს, რომ დასავლური ქვეყნების მიერ ოპოზიციის მხარდაჭერა ბელარუსში არსებულ სიტუაციაში ჩარევას ნიშნავს.

„საუბარია დაფინანსებაზე, გვაიძულებენ ეუთოსთან მოლაპარაკებებს - გასაგებია, თუ რატომ აკეთებენ ისინი ამას. დასავლეთის ქვეყნების მიერ განხორციელებული ქმედებები და მათ მიერ გაკეთებული განცხადებები ბელარუსში არსებულ სიტუაციაში პირდაპირი ჩარევაა,“- აღნიშნა ლუკაშენკომ.

შეგახსენებთ, ბელარუსში 9 აგვისტოს გამართული საპრეზიდენტო არჩევნების შემდეგ საპროტესტო აქციები არ წყდება. მომიტინგეები პრეზიდენტ ლუკაშენკოს გადადგომას და ქვეყანაში ხელახალი არჩევნების ჩატარებას მოითხოვენ.