მოსკოვმა და ანკარამ S-400-ის ტიპის რუსული საზენიტო-სარაკეტო თავდაცვითი სისტემის მეორე პარტიის თურქეთისთვის მიწოდების შესახებ კონტრაქტს ხელი მოაწერეს. ამის შესახებ რუსეთის სამხედრო პროდუქციის იმპორტ-ექსპორტის უწყების „როსობორონექსპორტის“ გენერალურმა დირექტორმა ალექსანდრ მიხეევმა ჟურნალისტებს საერთაშორისო სამხედრო-ტექნოლოგიურ ფორუმზე განუცხადა.

მისივე თქმით, თურქეთისთვის S-400-ის მიწოდების შესახებ მეორე კონტრაქტი ხელმოწერილია, თუმცა მოსკოვსა და ანკარას მოუწევთ მისი რეალიზაციის ფინანსურ მოდელზე იმსჯელონ. „ეს უკვე დამოკიდებულია ჩვენს პარტნიორებზე საბოლოოდ გადაწყვიტონ ამ პროექტის დაფინანსებასთან დაკავშირებული პროცედურული საკითხები“, - განუცხადა ალექსანდრ მიხეევმა ჟურნალისტებს კითხვაზე პასუხისას, დაიწყება თუ არა 2021 წელს თურქეთისთვის S-400-ის დამატებითი პარტიის მიწოდების შესახებ კონტრაქტის რეალიზაცია.

შეგახსენებთ, თურქეთმა რუსეთისგან S-400-ის ტიპის საზენიტო-სარაკეტო სისტემის ოთხი დივიზიონი 2019 წელს შეიძინა. ამ კონტრაქტის წინააღმდეგი იყო აშშ. ვაშინგტონი ამტკიცებს, რომ S-400 ნატო-ს თავდაცვით სისტემებს არ შეესაბამება და ალიანსის წევრებს საფრთხეს უქმნის.