ავღანეთის ჩრდილოეთში მდებარე ბალხის პროვინციაში თალიბმა მეამბოხეებმა ქვეყნის არმიის სადივიზიო-სადესანტო რაზმის წევრებზე თავდასხმა მოაწყვეს, რის შედეგადაც დაიღუპა 3 და დაშავდა 41 ადამიანი, - ამის შესახებ ინფორმაციას „როიტერსი“ ავღანეთის თავდაცვის სამინისტროზე დაყრდნობით ავრცელებს.

მათივე ინფორმაციით, თავდასხმაზე, რომლის დროსაც სატვირთო ავტომობილში მდებარე ბომბი აამოქმედეს, პასუხისმგებლობა დაჯგუფება „თალიბანმა“ უკვე აიღო.

დაღუპულებს შორის ერთი მშვიდობიანი მოქალაქეა. რა შეეხება დაშავებულებს, მათ შორის 6 სადივიზიო-სადესანტო რაზმის წევრი, დანარჩენი კი მშვიდობიანი მოქალაქეები არიან.

აღსანიშნავია, რომ „თალიბანის“ დელეგაცია პაკისტანის დედაქალაქში იმყოფება, სადაც სამშვიდობო პროცესთან დაკავშირებით აშშ-სთან მიღწეულ შეთანხმებაზე მოლაპარაკებები უნდა გაიმართოს, რომლის თანახმადაც აშშ-მ ავღანეთიდან საკუთარი ჯარი უნდა გაიყვანოს, ამის სანაცვლოდ კი „თალიბანმა“ ქვეყანაში უსაფრთხოება უნდა უზრუნველყოს და ქვეყნის მთავრობასთან ხელისუფლების გადანაწილების საკითხზე მოლაპარაკებები დაიწყოს.