კიევმა ოფიციალურ მინსკთან ყველა კონტაქტი შეაჩერა,- ამის შესახებ უკრაინის საგარეო საქმეთა მინისტრმა, დიმიტრი კულებამ, უკრაინულ ტელეკომპანია „1+1“-ის ეთერში განაცხადა.

„ოფიციალურად ვაცხადებ : ბელარუსულ მხარესთან ყველა კონტაქტი გაყინული, დაპაუზებული გვაქვს“, – განაცხადა საგარეო საქმეთა მინისტრმა.

კულებას თქმით, უკრაინა ბელარუსთან დაკავშირებით ევროკავშირის პოზიციას შეუერთდა. მისივე განმარტებით, კიევმა ეს ნაბიჯი ბელარუსში მშვიდობიანი დემონსტრანტების მკვლელობის საპასუხოდ მიიღო.

შეგახსენებთ, ბელარუსში მესამე კვირაა 9 აგვისტოს საპრეზიდენტო არჩევნების ოფიციალურ შედეგებს აპროტესტებენ. დემონსტრანტები პრეზიდენტ ალექსანდრე ლუკაშენკოს გადადგომასა და ხელახლი აჩევნების ჩატარებას მოითხოვენ. სამართალდამცავებმა აქციები რამდენჯერმე დაშალეს და ათასობით მონაწილე დააკავეს. ოფიციალური ინფორმაციით, საპროტესტო აქციების დროს 4 ადამიანი გარდაიცვალა.