გიორგი ვაშაძე - გთავაზობთ გზას, როგორ უნდა შევქმნათ სამუშაო ადგილები, გავაიაფოთ კრედიტები, მივაქციოთ ყურადღება დევნილებს და ვეტერანებს

გთავაზობთ გზას, როგორ უნდა შევქმნათ სამუშაო ადგილები, გავაიაფოთ კრედიტები, მივაქციოთ ყურადღება დევნილებს და ვეტერანებს, სწორედ ამიტომ უნდა დავიწყოთ აღმშენებლობა, - ამის შესახებ „სტრატეგია აღმაშენებელის" ლიდერმა გიორგი ვაშაძემ და მისმა გუნდმა ზუგდიდში, დადიანების სასახლეში შეკრებილ მხარდამჭერებთან შეხვედრისას განაცხადა. როგორც „ინტერპრესნიუსს“ „სტრატეგია აღმაშენებლიდან“ აცნობეს,

ვაშაძემ ამომრჩევლებს წინასაარჩევნო პროგრამა წარუდგინა, სამოქმედო გეგმები გააცნო და მთავრობაში მოსვლის მთავარ მიზნებზე ესაუბრა.

„აღმშენებლობის სტრატეგიაზე ძალიან ბევრი ქართველი და უცხოელი ექსპერტი მუშაობდა, მასში დეტალურად გაწერილია, თუ რა უნდა გავაკეთოთ ქალაქებში, რეგიონებსა და სოფელში, როგორ უნდა შევქმნათ სამუშაო ადგილები, როგორ უნდა გავაიაფოთ კრედიტები, როგორ უნდა გავუმართოთ ხელი პენსიონრებს, ყურადღების მიღმა არ დავტოვოთ ვეტერანები, რომლებიც დღეს სამწუხაროდ არავის ახსოვს, როგორ დავეხმაროთ იძულებით გადადგილებულ თანამოქალაქეებს, როგორ შევუქმნათ მათ ღირსეული ცხოვრების პირობები და როგორ მივაღწიოთ მათი საცხოვრებელ სახლებში, აფხაზეთსა და სამაჩაბლოს რეგიონში მშვიდობიანი დაბრუნება. ნუთუ არ დაიმსახურეს ამ ადამიანებმა 8 წლის განმავლობაში ხელისუფლებას მათზე ეზრუნა, ნუთუ არ შეიძლებოდა მოეკლოთ საკუთარი კომფორტისთვის გაწეული სახელმწიფო ხარჯები და მათ დახმარებოდნენ. მაგრამ, როდესაც ხელისუფლებაში გყავს ადამიანების ერთობლიობა, არ აწუხებთ ხალხის ბედი და რომლებიც მოწყვეტილნი არიან მთლიანად საზოგადოებრივ პრობლემებსა და ქვეყნის რეალობას, ეს არ უნდა გაგვიკვირდეს. მათ ერთადერთი, რაც აინტერესებთ არის უფრო მეტი სიმდიდრის დაგროვება კრიმინალებთან თანამშრომლობის ხარჯზე. სწორედ ამიტომ ვამბობთ, რომ უნდა დავიწყოთ აღმშენებლობა. ჩემი პოლიტიკაში ყოფნის უპირველესი მიზანიც სწორედ ეს არის. ეს არაა საარჩევნო დაპირება, ეს ჩემი ცხოვრების არსია, რისთვისაც დღეს მე აქ თქვენს წინაშე ვდგავარ. ესაა სწორედ, „სტრატეგია აღმაშენებელის“ უმთავრესი და უპირველესი ამოცანა - ერთიანი, ძლიერი საქართველო“, - განაცხადა გიორგი ვაშაძემ.

ადგილობრივებთან შეხვედრისას „სტრატეგია აღმაშენებლის" ლიდერმა ქვეყნის ისტორიაც გაიხსენა და აღნიშნა, რომ 900 წლის წინ სწორედ სამეგრელოში, ჭყონდიდში, დღევანდელ მარტვილში დაისახა საქართველოს აღმშენებლობის იდეა, დიდმა მეფემ დავით აღმაშენებელმა შექმნა იმდროინდელი აღმშენებლობის სტრატეგია საკუთარ მასწავლებელთან, გიორგი ჭყონდიდელთან ერთად.

„900 წლის წინ, როცა მოქმედებაში მოვიდა აღმშენებლობის სტრატეგია, არავის სჯეროდა, რომ საქართველო იმ უკიდეგანო ქაოსს დაამარცხებდა, რაც მაშინ ქვეყანაში იყო, მაგრამ ჩვენმა წინაპრებმა შეძლეს, ეს პერიოდი დღემდე „ოქროს ხანად" მოიხსენება. სწორედ ერთად დგომით, ერთიანობით ჩვენ უარი უნდა ვთქვათ დაპირისპირებაზე, დავდგეთ ერთად და დავიწყოთ ახალი ოქროს ხანის მშენებლობა საქართველოში, რომლითაც ვიამაყებთ ჩვენ და ჩვენი მომავალი თაობები. ახალი ოქროს ხანა, რომელიც მოიტანს თითოეული მოქალაქის ოჯახში სიკეთეს და სიძლიერეს, დაუბრუნებს სიამაყეს საქართველოს მოქალაქეს! მე მინდა ის საქართველო თქვენთან ერთად, სადაც თითოეული ჩვენგანი ამაყი იქნება, რომ ამ ქვეყნის შვილები ვართ. მე არ მივიღებ მონაწილეობას კინკლაობასა და ერთანეთის დაპირისპირებაში. ერთადერთი რაც ჩემს გუნდთან ერთად შემიძლია ეს არის დღე და ღამე ვიფიქრო საქმის კეთებაზე, ხალხის პრობლემებსა და გაჭირვებაზე, ვიმუშაოთ იმისთვის, რომ საქართველოს ყველა მოქალაქეს გაუჩნდეს პერსპექტივა, თითოეულმა საქართველოს მოქალაქემ საკუთარ თავზე არ იგრძნოს, რომ ქვეყანა წინ მიდის, ვითარდება! ეს არის ჩვენი მიზანი, რომლის ირგვლივ უნდა გავერთიანდეთ", - აღნიშნა გიორგი ვაშაძემ.

ალექსანდრე თვალჭრელიძე - „ქართული ოცნების“ ეკონომიკური პროგრამა გაცილებით უფრო მოკრძალებული, მაგრამ, ამავდროულად, გაცილებით უფრო რეალისტურია
ქართული პრესის მიმოხილვა 21.09.2020
რევაზ კოპალაძე - ქვეყნებში, სადაც გულშემატკივრობენ საქართველოს, მტკივნეულად აღიქვამენ სახელმწიფოს ჩარევას „კავკასუს ონლაინის“ სამეწარმეო თავისუფლებაში
რან გიდორი - სწრაფვა მშვიდობისკენ კორონავირუსის დასამარცხებლად