ირაკლი კობახიძის განცხადებით, კორონავირუსზე ტესტირება „ქართული ოცნების“ ცენტრალური ოფისის რამდენიმე ათეულ ადამიანს, მათ შორის მასაც ჩაუტარდა
„ქართული ოცნების“ აღმასრულებელი მდივანი ირაკლი კობახიძე აცხადებს, რომ მას ახალ კორონავირუსზე ტესტირება ჩაუტარდა და კორონავირუსი არ დაუდასტურდა.
როგორც ირაკლი კობახიძე განმარტავს, ამ ეტაპზე, საარჩევნო კამპანიის შეფერხების საფუძველი არ არსებობს.
„ქართული ოცნების“ ცენტრალურ ოფისში რამდენიმე ათეულ ადამიანს ჩაუტარდა ტესტირება კორონავირუსზე, მათ შორის, მეც გავიარე ტესტირება და პასუხები უარყოფითია, გარდა იმ ერთი თანამშრომლის და მასთან დაკავშირებული რამდენიმე შემთხვევისა. სხვა შემთხვევაში პასუხები ახალ კორონავირუსზე უარყოფითია. არ გვაქვს არავითარი საფუძველი, რომ შევაფერხოთ ჩვენი საარჩევნო სამუშაოები“, - განაცხადა კობახიძემ.
შეგახსენებთ, „ქართული ოცნების“ სათავო ოფისში დასაქმებულ რამდენიმე პირს ახალი კორონავირუსი დაუდასტურდა. ამასთან, კორონავირუსი დაუდასტურდა პარლამენტის თავმჯდომარის პირადი დაცვის თანამშრომელს, რის გამოც არჩილ თალაკვაძე თვითიზოლაციაში გადავიდა.
