ბაჰრეინი ისრაელთან ურთიერთობების სრულ ნორმალიზებას უახლოეს მომავალში აპირებს. ამ ინფორმაციას ისრაელის საზოგადოებრივი მაუწყებელი ავრცელებს.

როგორც ცნობილია, ბაჰრეინის ხელისუფლებამ აღნიშნული გადაწყვეტილება მას შემდეგ მიიღო, რაც ისრაელმა და არაბთა გაერთიანებულმა საამიროებმა ორმხრივი ურთიერთობის შესახებ ხელშეკრულება გააფორმეს.

შეგახსენებთ, 13 აგვისტოს აშშ-ის შუამდგომლობით, ისრაელი და არაბთა გაერთიანებული საამიროები ურთიერთობების სრულ ნორმალიზებაზე შეთანხმდნენ. არაბთა გაერთიანებული საამიროები ეგვიპტისა და იორდანიის შემდეგ რიგით მესამე ქვეყანა გახდა, რომელმაც ისრაელთან სამშვიდობო შეთანხმებას მოაწერა ხელი. მიმდინარე წლის 29 აგვისტოს არაბთა გაერთიანებულმა საამიროებმა ისრაელის წინააღმდეგ 1972 წელს მიღებული ეკონომიკური ბოიკოტი გააუქმა.