„თავს მოვიკლავ, თუ დღეს პროკურორი არ შემხვდება“, - ამის შესახებ ფეხბურთელ გიორგი შაქარაშვილის საქმეზე დაკავებული არასრულწლოვნის ზ.ხ.-ს მამამ, თამაზ ხომასურიძემ გენერალურ პროკურატურაში განაცხადა.

ის საქმის პროკურორ დავით ყაზარაშვილთან შეხვედრას ითხოვს და აცხადებს, რომ მასთან კითხვები აქვს.

"სამი კითხვა მაქვს პროკურორთან, შეცვალა თუ არა, ჩემი შვილის ჩვენება, წააკითხეს თუ არა ჩემ შვილს ის ჩვენება, რაზეც ხელი მოაწერინეს და ასევე სიცრუის დეტექტორს ვითხოვ", - განაცხადა ხომასურიძემ.

მისივე განმარტებით, ის დღეს, გიორგი შაქარაშვილის ბიძის, მირიან ნიკოლაძის წინააღმდეგ განცხადების დაწერას აპირებს, ვინაიდან, მისივე თქმით, სწორედ ნიკოლაძემ მიუგზავნა მას ის ადამიანები, რომლებმაც დაზიანებები მიაყენეს.