ჩინეთი და ინდოეთი საზღვრის სადავო ნაწილიდან ჯარების „სწრაფად გაყვანაზე“ შეთანხმდნენ
ჩინეთი და ინდოეთი სამხედრო დაძაბულობის შემცირების მიზნით, საზღვრის სადავო ნაწილიდან ჯარების „სწრაფად გაყვანაზე“ შეთანხმდნენ. მედიის ინფორმაციით, ჩინეთის სახელმწიფო მრჩეველმა და საგარეო საქმეთა მინისტრმა ვან იმ და ინდოეთის საგარეო საქმეთა მინისტრმა სუბრაჰმანიამ ჯაიშანკარმა მოსკოვში, შანხაის თანამშრომლობის ორგანიზაციის საგარეო საქმეთა სამინისტროების შეხვედრის ფარგლებში, მოლაპარაკებები გამართეს და სადავო საზღვართან დაკავშირებით დავის დასრულებას შეეცადნენ.
შეგახსენებთ, მიმდინარე წლის ივნისში, ინდოელ და ჩინელ ჯარისკაცებს შორის ჰიმალაის სასაზღვრო რეგიონში მომხდარ შეტაკებას 20 ინდოელი ჯარისკაცის სიცოცხლე ემსხვერპლა. ინციდენტის შემდეგ საზღვრის გასწვრივ ორივე მხარემ დამატებითი ძალები განალაგა.
