საქართველოს პარლამენტის შენობასთან ივენთ-მენეჯერებმა, ტურისტული კომპანიების, ასევე საკლუბო და სარესტორნო ბიზნესის წარმომადგენლებმა აქცია გამართეს.
ობიექტების მეპატრონეები რეგულაციების დაცვით მათი ობიექტების ამუშავებას, ხელისუფლების მხრიდან რეაგირებას და მათთან მოლაპარაკებას ითხოვენ.
მათი თქმით, მოთხოვნების დაკმაყოფილებამდე აქციების გაგრძელებას გეგმავენ.
,,ჩვენი მოთხოვნაა, რომ ყურადღება მოგვაქციონ, ჩვენ არ ვითხოვთ მათგან მხარდაჭერას, უბრალოდ, მოგვცენ საშუალება, რომ ვიმუშაოთ, ჩვენი შრომით გამოვიმუშაოთ თანხები და ვარჩინოთ ოჯახები.
ჩვენი აქცია არის აპოლიტიკური, არ ემხრობა პოლიტიკას და ვართ გამოსულები მშვიდობიანად. აქ არიან შეკრებილი მომღერლები, მოცეკვავეები, ტურისტული კომპანიები, მსახიობები, სარესტორნო ბიზნესი და სხვადასხვა სფეროს წარმომადგენლები.
ვიცავთ რეგულაციებს, რაც დააწესეს, მაგრამ მიუხედავად ამისა, ვიკეტებით. ჩვენ აღარ გვაქვს იმის საშუალება, რომ ვიმუშაოთ, ამიტომ გაგვცენ პასუხი, რითი ვიარსებოთ“, - აღნიშნა მომღერალმა ანი როგავამ.