ოპოზიციური პარტიების წარმომადგენლებმა არჩევნებისთვის პარტიებთან მიმართებაში შემუშავებულ “ქცევის კოდექსს” ხელი მოაწერეს.
როგორც"ინტერპრესნიუსს" "ევროპული საქართველოს" წარმომადგენელმა ლევან თარხნიშვილმა განუცხადა, დოკუმენტი საერთაშორისო ორგანიზაციებმა შეიმუშავეს.
მისივე განმარტებით, ოპოზიციურმა პარტიებმა დოკუმენტს ხელი "პრინციპულად მმართველი გუნდისგან ცალკე მოაწერეს", რადგან "ქართული ოცნების" მხრიდან კოდექსის ნორმების დაცვის მოლოდინი არ არსებობს.
ოპოზიციურმა პარტიებმა "ქცევის კოდექსი" “ლეიბორისტული პარტიის" ცენტრალურ ოფისში გამართულ შეხვედრაზე გააფორმეს.
"გრძელდება ქართული ოპოზიციის უპრეცედენტო თანამშრომლობა ოლიგარქიული რეჟიმის დემოკრატიულად შესაცვლელად. დღეს ჩვენ ხელს ვაწერთ „ქცევის კოდექსს“ მმართველი პარტიის გარეშე, რადგან მათთან ერთად რაიმე ვალდებულების აღება ნიშნავს მგელთან კომუნიკეს დადებას, რომ ის ვეგეტარიანელი გახდება და ხორცს არ შეჭამს. ჩვენ დღეს შევასრულეთ დიდი ვაჟა ფშაველას დანაბარები "ბილწთ არ შავეკვრი ზავით". არასდროს ზავით არ შევეკვრებით ძალას,რომლის მიზანია ქვეყნის დაქსაქსვა, განადგურება. მინდა უდიდესი მადლობა მოვახსენო აქ წარმოდგენილ ქართულ პოლიტიკურ ელიტას, ოპოზიციას, ქართული პოლიტიკა ისაა, რაც ამ ფორმატში ხდება და ამას მთელი მსოფლიოში აღიარებს. ვერანაირმა ძალამ პოზიცია ვერც ერთ პარტიას და ლიდერს ვერ შეაცვლევინა იმ გზაზე, რომელსაც მივყვევით. ეს არის გამარჯვებისა და ქვეყნის ხსნის გზა", - განუცხადა ჟურნალისტებს "ლეიბორისტული პარტიის" ლიდერმა შალვა ნათელაშვილმა.
შეგახსენებთ, რომ პოლიტიკური პარტიებისთვის შემუშავებულ „ქცევის კოდექსს“ „ქართული ოცნებაც“ შეუერთდა.