ალეკო ელისაშვილმა საარჩევნო ბანერზე საკუთარი ტელეფონის ნომერი გამოაქვეყნა და კამპანია ,,ალეკო გისმენთ“ წამოიწყო.

მისი განცხადებით, მაჟორიტარი დეპუტატობის კანდიდატიც და მაჟორიტარიც ვალდებულია პასუხობდეს ხალხის ზარებს, ისმენდეს მათ პრობლემებს და აგვარებდეს.

,,მძიმე აღსაქმელია წინასაარჩევნოდ ბანერებიდან, შენობებიდან და კორპუსებიდან ყალბად მომღიმარი პოლიტიკოსები, თან ხალხს რომ ეხუტებიან და თან ვითომ მზრუნველად გვიღიმიან. ამაზე პროტესტი თავადაც სულ მქონდა და ამიტომ გადავწყვიტეთ სხვა გზით წავსულიყავით, მითუმეტეს, სხვა პოლიტიკოსებისგან და პარტიებისგან განსხვავებით, სულ რამდენიმე ბანერი გვაქვს.

მაჟორიტარი დეპუტატობის კანდიდატიც და მაჟორიტარიც ვალდებულია პასუხობდეს ხალხის ზარებს, ისმენდეს მათ პრობლემებს და აგვარებდეს. ამიტომ გადავწყვიტეთ ბანერზე ის ყოფილიყო, რაც რეალურად უნდა ხდებოდეს. უნდა იყოს ურთიერთობა და ანგარიშვალდებულება ადამიანებთან. აი ეს არის ნამდვილი, ეს არის მაჟორიტარის საქმე და არა საარჩევნოდ სტუდიაში გადაღებული ძვირადღირებული ფოტოები, რომელზეც ცინიზმი იკითხება“ - აცხადებს ალეკო ელისაშვილი.