თბილისის მერიის ინფორმაციით, ბაგრატიონის ქუჩაზე ავარიული სახლის გამაგრება დასრულდა
დიდუბის რაიონის გამგეობამ მიმდინარე წელს ოთხ ამხანაგობას ავარიული საცხოვრებელი სახლის პრობლემა მოუგვარა. როგორც „ინტერპრესნიუსს“ თბილისის მერიიდან აცნობეს, პროექტებისთვის ჯამში, 716 879 ლარი გამოიყო.
მათივე ცნობით, ერთ-ერთი ასეთი პროექტი ვახუშტი ბაგრატიონის ქუჩის N61-ში მდებარე სამსართულიანი საცხოვრებელი სახლია, რომლის გამაგრების სამუშაოებიც უკვე დასრულდა.
„პროექტის ფარგლებში, შენობის საძირკველი და მზიდი კედლები მონოლითური რკინა-ბეტონით გამაგრდა. ასევე, რეაბილიტაცია ჩაუტარდა შენობის აივნებს და შეიცვალა შენობაში არსებული დაზიანებული კარ-ფანჯარა.
შენობის კაპიტალური გამაგრების სამუშაოებისთვის გამგეობის ბიუჯეტიდან 435 490 ლარი გამოიყო. პროექტი „ბინათმესაკუთრეთა ამხანაგობების განვითარების ხელშეწყობის პროგრამის“ ფარგლებში განხორციელდა.
აღნიშნული შენობა 1882 წელს აშენდა და გამაგრების სამუშაოები არასდროს ჩატარებულა. ავარიული შენობების გამაგრების პროცესი მთელი წლის განმავლობაში გაგრძელდება“, - ნათქვამია ინფორმაციაში.
v-if="article.gallery" v-html="article.gallery"
