პარლამენტის პლენარულ სხდომაზე, სადაც ინტერპელაციის წესით ეკონომიკის მინისტრს ნათია თურნავას უსმენენ, ხმაური იყო.

ხმაური "ევროპული საქართველოს" წევრების მიერ სხდომათა დარბაზის დატოვებამ გამოიწვია, რაზეც უმრავლესობის წევრმა მიხეილ ყაველაშვილმა მათ მიმართა, რომ ისევე გარბიან დარბაზიდან, როგორც "ომის დროს გარბოდნენ".

აღნიშნულზე მას გიგა ბოკერიამ შემდეგი რეპლიკით უპასუხა - "ჩვენს შორის ვინც ომის დროს გარბოდა, იმის დედა ვატირე".

მომხდარს გამოეხმაურა პარლამენტის თავმჯდომარე და კოლეგებს სიმშვიდისკენ მოუწოდა.

"კორექტულად, პარლამენტში გინება არ არის ღირსეული საქციელი", - განაცხადა მან.

"ევროპულმა საქართველომ" დარბაზი მას შემდეგ დატოვა, რაც კითხვა- პასუხისა და დაზუსტებების პროცედურა დასრულდა.

ყოფილი ხელისუფლების წარმომადგენლები ომის დროს ქვეყნიდან გაქცევაში პლენარულ სხდომაზე თავდაპირველად ეკონომიკის მინისტრმა ნათია თურნავამ დაადანაშაულა.

„თქვენი ნამართი კრიზისი ვნახეთ 2008 წლის აგვისტოში, როდესაც მაშინდელი ხელისუფლების წარმომადგენლები, ზოგი რომელ საზღვარზე გარბოდა და ზოგი - რომელზე, ქვეყნის დასატოვებლად“,- მიმართა ეკონომიკის მინისტრმა „ევროპული საქართველოს“ წევრებს.