„ქართულმა ოცნებამ“ საბოლოოდ უარი თქვა დამოუკიდებელ სასამართლოსა და მოსამართლეებზე, - ასე ეხმაურება “ალეკო ელისაშვილი მოქალაქეების” ლიდერი ლევან იოსელიანი ვენეციის კომისიის განცხადებას.
მისი შეფასებით, ხელისუფლება ცდილობს, ყველა მოატყუოს, მაგრამ მათი უკვე არავის სჯერა.
“ვენეციის კომისიის განცხადებაც ამის კიდევ ერთი დადასტურებაა. ივანიშვილს ყველაზე მეტად სასამართლოს დამოუკიდებლობის ეშინია, რადგან უამრავი დამნაშავე და კორუფციონერი დაასვა ქვეყანას თავზე. ოქტომბერში გვაქვს შანსი, მატყუარები გავისტუმროთ ხელისუფლებიდან და პირველად, დამოუკიდებლობის მოპოვების მერე, დამოუკიდებელი სასამართლოს მშენებლობა დავიწყოთ”,- წერს იოსელიანი, რომლის განცხადებასაც “ალეკო ელისაშვილი მოქალაქეების” პრესსამსახური ავრცელებს.
ცნობისთვის, ევროკავშირის საგარეო საქმეთა და უსაფრთხოების პოლიტიკის წამყვანი სპიკერი პეტერ სატანომ საქართველოში უზენაესი სასამართლოს მოსამართლეების შერჩევის პროცესთან დაკავშირებით განცხადება გაავრცელა. განცხადებაში ევროკავშირი მწუხარებას გამოთქვამს, რომ პარლამენტი არ დაელოდა ვენეციის კომისიის დასკვნის გამოქვეყნებას.
როგორც განცხადებაშია ნათქვამი, სასამართლო სისტემაში ეთიკისა და მთლიანობის უმაღლესი სტანდარტების დაცვა გადამწყვეტია საქართველოს სანდოობისათვის მისი მოქალაქეებისა და საერთაშორისო პარტნიორების თვალსაზრისით და ევროკავშირსა და საქართველოს შორის პარტნიორობის განვითარებისათვის.