ლევან დავითაშვილის განცხადებით, საქართველოში ფრინველის ხორცზე დეფიციტი არ შეიქმნება

გარემოს დაცვის და სოფლის მეურნეობის მინისტრის, ლევან დავითაშვილის განცხადებით, საქართველოში ფრინველის ხორცზე დეფიციტი არ შეიქმნება. ამის შესახებ განმარტება მინისტრმა მთავრობის სხდომის დასრულების შემდეგ მედიასთან გააკეთა. როგორც დავითაშვილმა აღნიშნა, ფრინველის ხორცის მარკეტინგული მოთხოვნების შესახებ ტექნიკური რეგლამენტი ძალაში ოქტომბრის ბოლოს შევა და მისი ამოქმედება აღარ გადავადდება.

„რამდენიმე დღეა ჩვენ ვუყურებთ ამ თემის გარშემო ატეხილ ამბავს. როდესაც გადავადებასთან დაკავშირებული გადაწყვეტილება მივიღეთ, ეს იყო მწვავე პერიოდი კოვიდთან დაკავშირებული, როცა სხვადასხვა ქვეყანა ზღუდავდა ექსპორტს. ამ შემთხვევაში ჩვენთვის სასიცოცხლოდ მნიშვნელოვანი იყო, ჩვენი ქვეყნის სასურსათო უზრუნველყოფა, ის, რომ არ ყოფილიყო დეფიციტი არც ერთ მნიშვნელოვან სასურსათო პროდუქტზე. ეს იყო პასუხისმგებლიანი გადაწყვეტილება და ამაზე პასუხს სრულად ვაგებთ. თუმცა, ამას მოჰყვა სპეკულირება ადგილობრივი მწარმოებლების მხრიდან, რომ რომ ვიღაცის ინტერესების ლობირება ხდებოდა და ა.შ. ახლა ჩვენ არ ვგეგმავთ არანაირ გადავადებას, არ ვხედავთ არანაირ შეზღუდვებს მსოფლიო ბაზარზე. აქ არის ორი ჯგუფი: ადგილობრივი მწარმოებლები ისევ გვადანაშაულებენ, რატომ მოხდა ეს, არასწორი იყოო, მეორე არის იმპორტიორების ჯგუფი, რომელიც ამბობს, რომ ამის შედეგად საქართველოში იქნება დეფიციტი. რა თქმა უნდა, დეფიციტი არ იქნება, ვაჭრობა გაგრძელდება და იქნება სამართლიანი ბაჭრობა.

საქართველო ერთ-ერთი ქვეყანაა, სადაც მკაცრი და მკაფიო რეგლამენტი არსებობს, მათ შორის მარკეტინგული სტანდარტები სახელმწიფო რეგლამენტის ფარგლებშია აყვანილი, იგივე ქათმის ხორცთან დაკავშირებითაც. ყველაფერი ნათელია, საქართველოში არ შეიქმნა დეფიციტი და მთავრობა არ გადახედავს თავის გადაწყვეტილებას“, - განაცხადა დავითაშვილმა.

ცნობისთვის, ტექნიკური რეგლამენტის თანახმად, რომელიც ძალაში 20 ოქტომბრიდან უნდა შევიდეს, 2025 წლამდე გაყინული და სწრაფად გაყინული ქათმის მარკეტინგი შეიძლება განხორციელდეს თუ წყლის შემცველობა არ აღემატება 5%-ს, ხოლო 2025 წლის შემდეგ, ტექნიკური რეგლამენტი ადგენს, გაციების მეთოდიდან გამომდინარე, წყლის შემცველობის დასაშვებ სხვადასხვა ნორმას.

რეგლამენტით განსაზღვრულია დაფასოებული ადგილობრივი წარმოების გაყინული ან სწრაფად გაყინული ფრინველის ხორცის წონის კატეგორიის მიხედვით კლასიფიცირება. რეგლამენტის თანახმად, ყველა დაფასოებულ პროდუქტს უნდა ჰქონდეს წონის მაჩვენებელი, რაც მომხმარებელთა უფლებების დაცვის ერთ-ერთი მნიშვნელოვანი პირობაა.

იმპორტირებული ხორცის შემთხვევაში, მას უნდა ახლდეს წარმოშობის ქვეყნის კომპეტენტური ორგანოს მიერ გაცემული სერტიფიკატი ან აკრედიტებული ლაბორატორიის მიერ გაცემული ოქმი, რომელიც ადასტურებს, რომ პროდუქტი შეესაბამება ტექნიკური რეგლამენტის მოთხოვნებს.

რეგულაციის ამოქმედება მთავრობამ მიმდინარე წლის აპრილში ერთხელ უკვე გადადო, რათა პანდემიიდან გამომდინარე ბაზარზე ხორცის დეფიციტი არ შექმნილიყო.

ხათუნა ლაგაზიძე - თუ ოპოზიციას რაციონალიზმი კი არა, თვითგადარჩენის ინსტინქტი მაინც შერჩენია, მოუწევთ გაერთიანება იმ საფრთხის წინააღმდეგ, რასაც ასპარეზზე ახალი პოლიტიკური ჯგუფების გამოჩენა ჰქვია
ქართული პრესის მიმოხილვა 07.05.2021
რამაზ საყვარელიძე - ოპოზიციიდან ბევრი შეეცდება სააკაშვილისგან გამიჯვნას და ლიდერის როლის მორგებას, მეეჭვება ეს წარმატებული მცდელობა იყოს, ამ ოპოზიციისთვის რთული იქნება სააკაშვილის დამარცხება
„გაგუას კლინიკაში“ covid 19–ის საწინააღმდეგო ვაქცინაციის კაბინეტი გაიხსნა
ბაქოში ევროპის ჩემპიონატის თასი ჩაიტანეს