საქართველოს ტერიტორიების საწინააღმდეგოდ ჩადენილ ქმედებებში ბრალდებული ივერი მელაშვილის მეუღლის, თამარ სულაძის განცხადებით, მისი მეუღლის მიმართ ბრალი შეთითხნილია.
როგორც სულაძე განმარტავს, ბრალდებულების დაკავება საარჩევნო პროცესს უკავშირდება.
„დანაშაული არ არსებობს, შეთითხნილი დანაშაულია, უნდათ პოლიტიკურად რაღაც ააგორონ, რომ იმ ხელისუფლების დროს ვითომ, რაღაც დანაშაული მოხდა, რომ ისინი არიან სისხლისმსმელები, მიწის გამყიდველები და ჩვენ ფრთიანი ანგელოზები ვართო. იმ ხალხმა, ვინც საქმეში ჩახედული არაა, შეიძლება იფიქროს, არიქა, ისინი არ მოვიდნენ ხელისუფლებაში, ესენი იყვნენო და ხმებს მოიპოვებენ. ყოველი არჩევნების წინ რაღაც სპექტაკლს დგამენ", -განაცხადა სულაძემ.
ის მისი მეუღლის პოზიციას, უარი თქვას გირაოს მოთხოვნაზე, არ ეთანხმება და მიიჩნევს, რომ სიმართლის დასადგენად ბრძოლა ციხის კედლებს მიღმაც შეიძლება.
„გირაოზე უარის თქმა არ მიმაჩნია გამართლებულად, ადვოკატს ვუთხარი, ბინას ჩავდებ, რომ გირაოთი გამოუშვან-მეთქი", - აცხადებს სულაძე.