სოსო გოგაშვილი ახალი ხელისუფლებისთვის დასაჭერად გამზადებული კრიმინალია, - ასე აფასებს „თავისუფალი საქართველოს“ ლიდერი, კახა კუკავა სუს-ის უფროსის ყოფილი მოადგილის, სოსო გოგაშვილის მიერ „ქართული ოცნების“ რიგების დატოვების ფაქტს.

მისი განცხადებით, სოსო გოგაშვილის მაგალითი არის იმის ნათელი დასტური, თუ რას ნიშნავს „ქართულ ოცნებაში“ იმსახურო და აკეთო ყველანაირი სიბინძურე.

„საბოლოოდ, „ქართულმა ოცნებამ“ გოგაშვილი ისე მოისროლა, როგორც ძალიან ბევრს მოექცა აქამდე. დღეს, პრაქტიკულად გოგაშვილი ახალი ხელისუფლებისთვის გამზადებული კრიმინალია და ეს ყველამ უნდა გაითვალისწინოს, ვინც ნებისმიერი ხელისუფლებისაგან უკანონო დავალებებს მიიღებს და განახორციელებს“, - განაცხადა „თავისუფალი საქართველოს“ ლიდერმა.

პარტიის ინფორმაციით, კახა კუკავა მაჟორიტარი დეპუტატობის კანდიდატად კენჭს ვაკის რაიონში იყრის.

ცნობისთვის, სახელმწიფო უსაფრთხოების სამსახურის უფროსის ყოფილმა მოადგილემ სოსო გოგაშვილმა პარტია „ქართული ოცნება“ დატოვა. გოგაშვილი „ქართულ ოცნებაში“ მონიტორინგის, კოორდინაციის და ანალიტიკის დეპარტამენტის უფროსი იყო.

ინფორმაციას „თავისუფალი საქართველოს“ პრესსამსახური ავრცელებს.