ორი კვლევის მიხედვით, რეიტინგში უკვე „ნაციონალურ მოძრაობასაც“ ვუსწრებთ. ვცდილობთ, დავიკავოთ მთავარი ოპოზიციური პარტიის ნიშა ქვეყანაში, - ამის შესახებ „ლელო საქართველოსთვის“ ვაკის მაჟორიტარობის კანდიდატმა ლევან კობერიძემ „პალიტრანიუსის“ გადაცემა „დღის ნიუსრუმში“ განაცხადა.

როგორც კობერიძემ აღნიშნა, „ლელოს“ მკაფიო გეგმა აქვს.

„ჩვენ აუცილებლად მოვალთ და დამთავრდება ე.წ. შავი ჯიპების ეპოქა. უკვე ორნიშნა ძალიან მკაფიო რეიტინგი გვაქვს. სამეულში უკვე მკაფიო ადგილი გვიკავია. ორი კვლევის მიხედვით კი, რეიტინგში „ნაციონალურ მოძრაობასაც“ ვუსწრებთ. ვცდილობთ, რომ დავიკავოთ მთავარი ოპოზიციური პარტიის ნიშა ქვეყანაში. ჩვენ ძალიან მკაფიო გეგმა გვაქვს და ყველაფერი ციფრებშია გაწერილი, ასევე ჩვენი მიზანია, მივიღოთ მინიმუმ გაორმაგებული ეკონომიკა. ჩვენ ის გუნდი ვართ, რომელიც არა მხოლოდ ჯანდაცვის გაძლიერებაზე, არამედ სისტემაზე ვფიქრობთ და ეს ყველაფერი აღნიშნულია „მარშალის გეგმაში“, - განაცხადა კობერიძემ.