ავღანეთის ცენტრალურ ნაწილში, ღურის პროვინციაში მომხდარ აფეთქებას სულ მცირე 12 ადამიანი ემსხვერპლა, 100-ზე მეტი კი დაშავდა- ამ ინფორმაციას ავღანეთის შინაგან საქმეთა სამინისტრო ავრცელებს.

მათი თქმით, ასაფეთქებელი მოწყობილობა ავტომობილზე იყო დამონტაჟებული. ტერაქტის დროს ავტომობილთან ახლოს მდებარე სამთავრობო შენობები დაზიანდა. დაშავებულები ღურის საავადმყოფოში გადაიყვანეს. რამდენიმე მათგანის მდგომარეობა კრიტიკულია და შესაძლოა, მსხვერპლის რაოდენობა გაიზარდოს.

მომხდარზე პასუხისმგებლობა ჯერჯერობით არცერთ დაჯგუფებას არ აუღია.

გავრცელებული ინფორმაციით, ტერაქტის უკან შეიძლება მოძრაობა „თალიბანი“ იდგეს.

სექტემბერში ავღანეთის ხელისუფლებასა და დაჯგუფებას შორის მოლაპარაკებები განახლდა, მხარეებმა შეთანხმების მიღწევა ვერ შეძლეს.