ქართული პრესის მიმოხილვა 19.10.2020

ვახტანგ ძაბირაძე - "საქართველო ძალიან სახიფათო გამოწვევების წინაშე დგას"

საქართველო განმეორებითი ჩაკეტვის ზღვარზეა - რატომ დაიწყო ქვეყანაში კორონავირუსის უკონტროლო გადაცემა

მამუკა ხაზარაძე - “პირებმა, რომლებიც წარსულში სისხლიან რეჟიმს ემსახურებოდნენ, ახალ მთავრობაში აღარ უნდა დაიკავონ საპასუხისმგებლო თანამდებობები”

რამდენად გამართლებულია ეპიდემიის დროს სააკაშვილის მიერ ახალი აქციების დაანონსება

პაატა იმნაძე - “თვითონ უნდა მიხედო თავს - ნიღაბი გაიკეთო, დისტანცია დაიცვა და იმუშაო”

* * *

ვახტანგ ძაბირაძე - "საქართველო ძალიან სახიფათო გამოწვევების წინაშე დგას"

“პანდემიურ სიტუაციას ოპოზიცია თავიდანვე ძალიან არასწორად მიუდგა და ახლაც ასე იქცევა. მიუხედავად იმისა, რომ ძალიან სწრაფად იზრდება ინფიცირებულთა რიცხვი, საზოგადოება მშვიდად შეხვდა შექმნილ ვითარებას და როდესაც ოპოზიცია პანდემიაზე აკეთებს აქცენტს, შეცდომას უშვებს - ეს არ არის ის თემა, რაც იმუშავებს ოპოზიციის სასარგებლოდ. ოპოზიციის საარჩევნო ლოზუნგებიც და ქმედებებიც ძალიან შეეფერება რევოლუციურ განწყობებს, ოღონდ ეს იმ შემთხვევაში იქნებოდა წარმატებული, თუ საზოგადოებაშიც იქნებოდა რევოლუციური მუხტი. საზოგადოების დიდ ნაწილში ამგვარი დამოკიდებულება არ ჩანს, მიუხედავად ხელისუფლების დიდი შეცდომებისა. როდესაც ხელისუფლებას აკრიტიკებ, მაშინ ამომრჩეველს უნდა შესთავაზო ალტერნატივა. კარგი, ხელისუფლებას გაექცა კორონავირუსი, მაგრამ ოპოზიციური ძალები როგორ აპირებენ ამ პროცესის გაკონტროლებას? მე მათი კონკრეტული სამოქმედო გეგმა არ მინახავს”, - აცხადებს ექსპერტი ვახტანგ ძაბირაძე გაზეთ “კვირის პალიტრისთვის” მიცემულ ინტერვიუში, სათაურით უნდა გადაიდოს თუ არა საპარლამენტო არჩევნები?! / “ჩემზე დიდი შთაბეჭდილება მოახდინა დაკავებული ივერი მელაშვილის პოზიციამ, როდესაც მან უარი თქვა გირაოს მოთხოვნაზე და განაცხადა, ამ ბრალდებით ციხეში ვიქნები თუ გარეთ, ჩემთვის არავითარი მნიშვნელობა არა აქვსო”.

“პანდემიის თემა მნიშვნელოვანია, მაგრამ ეს არ არის ის, რაც ოპოზიციას გამარჯვებას მოუტანს. ვფიქრობ, ოპოზიციაში იციან რეალური სურათი, აქვთ შიდა კვლევების შედეგები, შესაბამისად, გაუგებარია, რაში სჭირდებათ ეს რევოლუციური რიტორიკა? “ნაცმოძრაობის” მიერ ბათუმში გამართულ შეკრებაზე ერთი ინფიცირებულიც თუ იყო, ეს იქნება ვულკანური აფეთქება, თან იქ შეკრებილები არც მარტო ბათუმელები იყვნენ და არც მხოლოდ აჭარლები. როგორც ხდება ხოლმე, მთელ დასავლეთ საქართველოში “ნაცმოძრაობის” მხარდამჭერების მობილიზება მოხდა, რათა როგორმე მასშტაბური აქცია გამოსვლოდათ. თუ იქ ეპიდემიოლოგიური აფეთქება მოხდა, ქვეყანაში კატასტროფული მდგომარეობა გვექნება და ეს უპირველესად დარტყმა იქნება თავად “ნაციონალურ მოძრაობაზე”. იმედია, მიხვდებიან, რომ ამგვარი შეკრებები უპირველესად მათთვისვეა საზიანო. რაც შეეხება ადამიანის უფლებებს და მათ დაცვას, ეს რთული საკითხია. მიდის ბრძოლა ძალაუფლებისთვის, რაც, სამწუხაროდ, საქართველოში ომს დაემსგავსა. მთავარია, ამ ბრძოლაში გამარჯვება და თუ `მსხვერპლი~ იქნება, ეს დიდად არ ანაღვლებთ, მით უფრო არ ანაღვლებს სააკაშვილს”, - აღნიშნავს გამოცემის კორესპონდენტთან საუბრისას ვახტანგ ძაბირაძე.

“ამგვარი შეკრებები, სააკაშვილის ჩართვებით, იმ შედეგს მოიტანს, რომ გადაუწყვეტელი ამომრჩევლის დიდი ნაწილი ისევ “ქართული ოცნებისკენ” წავა. რაღაც ბონუსს ამით “ნაციონალებიც” მიიღებენ, მაგრამ შედარებით მცირერეიტინგიანი პარტიები ყველაზე მეტს დაკარგავენ. სააკაშვილის მოქმედება პოლარიზაციისა და ორპოლუსიანობის ჩამოყალიბებას უწყობს ისევ ხელს. “ნაციონალური მოძრაობა” დღეს იბრძვის არა გამარჯვებისთვის, არამედ შუა ნაწილის - მესამე, თუნდაც კომპლექსური ძალის გასაკრეფად და მთავარი ოპოზიციური ძალის სტატუსის შესანარჩუნებლად. ამ პროცესებისგან ელექტორალური დანაკლისი ექნებათ “ლელოს”, “ევროპულ საქართველოს”, “სტრატეგია აღმაშენებელს” და “პატრიოტთა ალიანსს”. ეს შეუწყობს ხელს იმას, რომ “ქართულმა ოცნებამ” მართლაც გადალახოს არა მარტო 40%-იანი ბარიერი, არამედ 50%-იანიც. 1%-იანი ბარიერის წყალობით ბევრი სხვა პარტიაც მოხვდება პარლამენტში, მაგრამ მმართველი ძალა მიიღებს გადაუწყვეტელი ამომრჩევლის ხმების მნიშვნელოვან ნაწილს. საქმე ისაა, რომ ამომრჩევლის ნაწილში სააკაშვილის აქტიურობა საფრთხის განცდას აჩენს”, - განაგრძობს რესპონდენტი.

“თუ არ იქნება პანდემიის კატასტროფული აფეთქება, ხელისუფლება შეეცდება არჩევნები ჩაატაროს. სექტემბრის დასაწყისში ოპოზიცია გაიძახოდა, ხელისუფლებას არჩევნების გადადება სურსო და ეს არასწორი მესიჯი იყო - ხელისუფლებას არც მაშინ აწყობდა და არც ახლა აწყობს არჩევნების გადადება. ვითარება არა მარტო ჩვენთან, არამედ მთელ მსოფლიოში იცვლება. პანდემიის გამო სულ უფრო ჩაკეტილი ხდება მსოფლიო, რაც დიდ პრობლემებს წარმოშობს. ძლიერი ეკონომიკის ქვეყნები ამას მეტ-ნაკლებად უძლებენ, მაგრამ ჩვენ რა დღეში ვიქნებით მომავალ თვეებში, კაცმა არ იცის. ვითარება უფრო დამძიმდება, ამიტომაც ხელისუფლებას ნამდვილად არ აწყობს არჩევნების გადადება, მით უფრო, აშკარაა, რომ “ქართული ოცნება” უპრობლემოდ მოიგებს ამ არჩევნებს. აქ მნიშვნელოვანი საკითხი ის არის, რამდენად შეძლებს ექსკლუზიურად ძალაუფლების შენარჩუნებას. დარწმუნებით შემიძლიათ გითხრათ - თუ ოპოზიცია კვლავ ასე უპასუხისმგებლოდ მოიქცევა, ნამდვილად შეძლებს”, - მიიჩნევს ექსპერტი.

“ბოლო 30 წლის განმავლობაში აქტიურად ვაკვირდები პოლიტიკურ პროცესებს და ვეჭვობ ვცდებოდე, როცა ვამბობ, რომ საზოგადოებაში რევოლუციური განწყობა არ არის. ეს განწყობა ნამდვილად არის ოპოზიციური პოლიტიკური ელიტის ერთ ნაწილში. ისინი მუდმივად ამბობენ, რომ მოსახლეობას აღარ უნდა “ქართული ოცნება”. შეიძლება ასეც არის, მაგრამ ამავე მოსახლეობას უფრო მეტად არ სურს ოპოზიცია, მით უფრო მისი წამყვანი ძალა “ნაციონალური მოძრაობა”. პრობლემა სწორედ ეს არის. რამდენიც უნდა ილაპარაკონ, რომ ხანგრძლივ აქციებს გამართავენ არჩევნების შემდგომ, ეს, ფაქტობრივად, წარმოუდგენელია, მით უფრო, რომ სერიოზული დარღვევები ამ წინასაარჩევნო პროცესებში არ არის, გამონაკლისი შემთხვევების გარდა, რაც ყველა არჩევნებზე ხდებოდა. არ ვიცი, რის იმედზეა ოპოზიცია. მოსახლეობაში არ არის რევოლუციური განწყობა, დასავლეთსაც ნამდვილად არ სცალია ახლა აქ საპროტესტო პროცესის მხარდასაჭერად. ვხედავთ, ბელარუსში რა ხდება და ევროკავშირი ხელსაც არ ანძრევს და მით უფრო ჩვენს რეგიონში გართულებული ვითარების ფონზე, ვგულისხმობ სომხეთ-აზერბაიჯანის დაპირისპირებას, აქ ახალი არეულობის კერის გაჩენა დასავლეთს არ ენდომება”, - ამბობს ვახტანგ ძაბირაძე და შეკითხვაზე - “რას ფიქრობთ საქართველო-აზერბაიჯანის საზღვრის მონაკვეთის შესახებ განვითარებულ სკანდალურ მოვლენებზე?” - პასუხობს:

“ჩემზე დიდი შთაბეჭდილება მოახდინა დაკავებული ივერი მელაშვილის პოზიციამ, როდესაც მან უარი თქვა გირაოს მოთხოვნაზე და განაცხადა, ამ ბრალდებით ციხეში ვიქნები თუ გარეთ, ჩემთვის არავითარი მნიშვნელობა არა აქვსო. ნებისმიერი თემა, რაც უნდა წამოიჭრას დღეს, აუცილებლად უნდა განვიხილოთ არჩევნების კონტექსტში. არსებობს ერთი მარტივი კითხვა - ამდენი წელია საზღვრის დადგენაზე ასე თუ ისე მუშაობდნენ, რატომ არ შეიძლებოდა საქმე აღეძრათ და ეს პირები არჩევნების შემდეგ დაეკავებინათ, რა საჭირო იყო ასეთი აჩქარება? ამაზე ხელისუფლებამ უნდა გასცეს არგუმენტირებული პასუხი. როცა მასალა შევაგროვეთ, მაშინ დავიწყეთ პროცესიო, ეს არ არის საკმარისი არგუმენტი”.

“ჩვენ არა ვართ ის ქვეყანა, რომელსაც აქვს ფუფუნება, თავის ნება-სურვილზე, იმის გაუთვალისწინებლად, თუ რა ხდება რეგიონში, მით უფრო, თუ საქმე ეხება მეზობლებთან ურთიერთობას, გადადგას ასეთი სერიოზული ნაბიჯები. როდესაც დროის ფაქტორი არაფერს ცვლის, ამგვარი მტკივნეული თემის ახლა წამოწევა შეცდომა იყო. შეეგროვებინათ მასალა, თუ ვინმეს მიმალვის საფრთხე იყო, ამის მოგვარების მექანიზმებიც არსებობს და შეეძლოთ გამოეყენებინათ, მაგრამ საკითხი წამოეჭრათ არჩევნების შემდგომ. უფრო უკეთესი კი ის იქნებოდა, დავლოდებოდით სომხეთ-აზერბაიჯანის კონფლიქტის მოგვარებას. ჩემთვის არა აქვს მნიშვნელობა, ვინ მოიპოვა რუკები, მთავარია, ისინი ავთენტური იყოს... თუ ვინმემ და მით უფრო რუსეთმა მოგვცა ეს რუკები, ცხადია, მას მხოლოდ გარეჯა არ ადარდებს და კიდევ რაღაც დგას ამის უკან, კრემლს, სავარაუდოდ, რაღაც მიზანი აქვს. ეს შესაძლოა იყოს საქართველოსა და აზერბაიჯანის სტრატეგიული პარტნიორობის დარღვევა, რაც დიდი ხანია სურს. აქ რომ საქმე მხოლოდ კომერციას და ვიღაცის მიერ დიდი ფულის გადახდას არ შეეხება, ცხადია. მე იურიდიულ მხარეს არ ვეხები, მხოლოდ პოლიტიკურზე ვლაპარაკობ და ამიტომაც გაჩნდა კითხვები. ხელისუფლებამ კეთილინებოს და გასცეს პასუხები. თუ ეს არ მოხდა, მაშინ ყველა ვერსიას, მათ შორის იმას, რომ ეს საარჩევნო ხრიკია, რომ ეს კრემლის გავლენების გამო ხდება აქვს არსებობის უფლება აქვს”, - დაასკვნის რესპონდენტი.

“სომხეთ-აზერბაიჯანის დაპირისპირება უფრო მასშტაბური ხდება, ვფიქრობ, რომ რუსეთი გარკვეულ დრომდე დაიცდის, ე. წ. სამშვიდობო კარტს გაათამაშებს, ერთ მშვენიერ დღეს კი იტყვის, ჩვენ ყველაფერი ვცადეთ, მაგრამ ამოიწურა ყველა შესაძლებლობაო და იმოქმედებს. საქმე ისაა, თუ სომხეთი მთიან ყარაბაღს დაკარგავს, მაშინ რუსეთი სომხეთს დაკარგავს, რაც იმის ნიშანი იქნება, რომ ნამდვილად შემცირდება კრემლის გავლენა სამხრეთ კავკასიაზე და მეეჭვება, რუსეთმა ეს დაუშვას. განსაზღვრულ ეტაპზე, ვფიქრობ, რუსეთი ჩაერევა ამ კონფლიქტში. რამდენად გააღრმავებს ეს რუსულ-თურქულ ტრადიციულ დაპირისპირებას, ძნელი სათქმელია. არა მგონია, რუსეთი ან თურქეთი მზად იყვნენ, ერთმანეთთან სამხედრო კონფლიქტის დასაწყებად, მაგრამ ეკონომიკურ-დიპლომატიური ომი მოსალოდნელია. ევრაზიის კონტინენტზე უმნიშვნელოვანესი პოლიტიკური ძვრებია. ჩვენს რეგიონში მარტო რუსულ და თურქულ გავლენაზე არ არის ლაპარაკი, ჩანს ჩინეთისა და ირანის ინტერესებიც”, - განმარტავს ექსპერტი.

“მე ზოგადპოლიტიკურ კონტექსტს ვგულისხმობ და არა მარტო ყარაბაღის კონფლიქტს. თუ რუსეთ-თურქეთის დაპირისპირება გართულდა, მერწმუნეთ, აუცილებლად წამოიწევს ჩინეთის და ირანის ინტერესებიც. ამ ვითარებაში დიდი სიფრთხილე გვმართებს. ჩვენმა ხელისუფლებამ ინტენსიურად უნდა ითანამშრომლოს დასავლელ პარტნიორებთან - აშშ-სა და ევროკავშირის ქვეყნებთან. ჩვენ ვერ შევძლებთ უარი ვუთხრათ რუსეთს ან თურქეთს, თუ ისინი მოგვთხოვენ სამხედრო ტექნიკის სომხეთის თუ აზერბაიჯანის მიმართულებით გატარებას. ასეთ შემთხვევაში ჩვენ დასავლეთის დიდი მხარდაჭერა დაგვჭირდება. საქართველო ძალიან სახიფათო გამოწვევების წინაშე დგას, რაც დღესვე უნდა იქნეს აშშ-სა და ნატოს ქვეყნებთან ერთად განხილული”, - დასძენს ძაბირაძე.

საქართველო განმეორებითი ჩაკეტვის ზღვარზეა - რატომ დაიწყო ქვეყანაში კორონავირუსის უკონტროლო გადაცემა

1192 ახალი ინფიცირებული ერთ დღეში - 18 ოქტომბერს დაფიქსირებული ეს ახალი ანტირეკორდს ინფექციონისტები საგანგაშოდ მიიჩნევენ. ხოლო გახდება თუ არა სიტუაცია კრიტიკული, ეს უახლოეს 2-3 კვირაში გამოჩნდება. ისინი თანხმდებიან, რომ მთავარი პრობლემა ვირუსის გავრცელების თვალსაზრისით მოსახლეობის მხრიდან რეკომენდაციების იგნორირებაა, ხოლო კარანტინის გამოცხადება ინფექციასთან ბრძოლაში დიდი ხნით ვერ დაგვეხმარება. ჯანდაცვის მინისტრი ეკატერინე ტიკარაძე ამ ეტაპზე ახალი შეზღუდვების შემოღების აუცილებლობას ვერ ხედავს. “საკოორდინაციო საბჭო ქვეყნის ჩაკეტვის გადაწყვეტილებას მაშინ მიიღებს, როცა შემთხვევები იმდენად მოიმატებს, რომ ვერ შევძლებთ მის ადეკვატურ მართვას, ანუ, როდესაც ექიმების, ტესტირების რესურსი და ჰოსპიტალური სექტორის რესურსი არ გვეყოფა”, - ამბობს ეკატერინე ტიკარაძე. ინფექციური საავადმყოფოს ბოქსირებული განყოფილების ხელმძღვანელი მარინა ენდელაძე კი ამბობს, რომ ადამიანებს არ უნდა სჭირდებოდეთ შეზღუდვების დაწესება”, - წერს გაზეთი “რეზონანსი” სტატიაში, სათაურით საქართველო განმეორებითი ჩაკეტვის ზღვარზეა - რატომ დაიწყო ქვეყანაში კორონავირუსის უკონტროლო გადაცემა.

“ვირუსის ზრდა, რა თქმა უნდა, რეგულაციების არდაცვას უკავშირდება. რატომ უნდა გვჭირდებოდეს განსაკუთრებული შეზღუდვა, როცა შეგვიძლია დავიცვათ ელემენტარული რეგულაციები - ვიყოთ ძირითადად სახლში, გარეთ გავიდეთ ნიღბით, დავიბანოთ ხშირად ხელები, დავიცვათ დისტანცია, არ წავიდეთ შეკრებებზე, არ გავაკეთოთ დიდი ქელეხები და ქორწილები, მით უმეტეს არ წავიდეთ აქციებზე და არ გავავრცელოთ ეს ვირუსი. ამას რად უნდა შეზღუდვები?! ჩვენ თვითონ უნდა შევზღუდოთ საზიანო ქმედებები. მორალი უნდა გვქონდეს, რომ ამდენი დაინფიცირებულის პირობებსა და უარესი საშიშროების მოლოდინში დავიცვათ ეს წესები, რადგან არ დაგვჭირდეს განსაკუთრებული შეზღუდვების დაწესება. მაინცდამაინც სახელმწიფო უნდა ჩამოიქცეს და ყველაფერი გაჩერდეს?! ხომ შეიძლება პირიქით, შევუწყოთ ხელი იმას, რომ ასე არ მოხდეს და შევუწყოთ ხელი ჩვენს თავს. მე არ ვიცი სახელმწიფოს რატომ არ შემოაქვს დამატებითი შეზღუდვები, ეს ჩემი საქმე არ არის, მაგრამ ბევრი მიზეზი არსებობს იმისათვის, რომ რეგულაციები არ შემოაქვთ. პირველ რიგში ისაა მიზეზი, რომ ქვეყანას განვითარება სჭირდება... თუ ჩვენ დავიცავთ რეკომენდაციებს, არაფერი განსაკუთრებული არ მოხდება, მაგრამ, სამწუხაროდ, არ ვართ ალბათ ის ხალხი, რომლებსაც ეს ყველაფერი ესმის”, - აცხადებს გამოცემის კორესპონდენტთან საუბრისას მარინა ენდელაძე.

“ჯანდაცვის მინისტრის განცხადებას ვეთანხმები, რადგან ქვეყანა მართავს ვირუსს და რესურსებიც არის საკმარისი. თუ ვირუსი ისე გავრცელდა, რომ რესურსები აღარ იქნება საკმარისი, თავისთავად მერე შემოიღებს სახელმწიფო შეზღუდვებს”, - განმარტავს ენდელაძე. ეპიდემიოლოგ ირაკლი ხმალაძის აზრით, ვირუსის გავრცელება მხოლოდ რეგულაციების არდაცვას არ უკავშირდება, რადგან შეინიშნება სწრაფი გადაცემის ტენდენცია, რის გამოც ინფექცია ძლიერდება. “ვირუსის გადაცემა რაც უფრო ხშირია, მით უფრო ძლიერდება იგი. ამ შემთხვევაში გაძლიერდა ვირუსის გადაცემის უნარი და ვირუსი ახალ თვისებებს იძენს. ჩვენ რომ გვქონოდა საშუალება თავის დროზე ვირუსის განეიტრალების, როცა 5-6 შემთხვევა იყო ხოლმე დაფიქსირებული, მაშინ ეს არ მოხდებოდა, მაგრამ ვინაიდან ჩვენ არც ვაქცინა და არც ბრძოლის სხვა საშუალებები არ გაგვაჩნია”, - ამბობს ხმალაძე, რომლის აზრით, “ამის გამო მოხდა, რომ დაინფიცრებულთა რიცხვი გაიზარდა და ასევე გაიზარდა გადამდებლობაც”, - აღნიშნავს გამოცემა.

“დღეს უკვე ძალიან ბევრი ადამიანია დაინფიცირებული, მათ შორის პოლიტიკოსები, ექიმები. აქედან გამომდინარე უკვე კონტროლირება ძალიან გართულდა, თუმცა რა თქმა უნდა, ის ფაქტიც არის, რომ ადამიანები მკაცრად არ იცავენ წესებს. შეიძლება ეკეთოთ ნიღაბი, მაგრამ არასწორად, ან ხშირად ვერ ახერხებდნენ ხელის დაბანას, ან ხვდებოდნენ ძალაუნებურად ხალხმრავალ გარემოში. ახლა ერთადერთი გამოსავალია, რომ მოვილიოთ ეს ვირუსი. მთავარი არის ის, რომ ჯერჯერობით არ გვაქვს პრობლემა საწოლებთან დაკავშირებით. ასევე ალბათ მსუბუქი ფორმით დაინფიცირებულთა ბინაზე მკურნალობის გადაწყვეტილებაც სწორი იყო. საერთოდ, საბანი ისე უნდა დაიფაროს ადამიანმა, როგორც გაწვდება - შეზღუდვებს ჩვენ მარტივად ვუყურებთ, რეალურად კი ძალიან დიდ პრობლემებს ქმნის ქვეყნის ეკონომიკისათვის, ადამიანთა ფსიქოლოგიური მდგომარეობაზეც ძალიან მოქმედებს. ამიტომ ყველა დადებითს უარყოფითიც ახლავს თან. შესაბამისად, მაქსიმალურად უნდა ვეცადოთ, რომ შეზღუდვები არ შემოვიღოთ, თუ ამას ვითარება არ მოითხოვს. არ სჭირდება ისეთ ინფექციას შეზღუდვები, რომელიც გრიპის ვირუსივით მიდის, ეს არ არის ორი სამი შემთხვევაა, ეს არის ძალიან დიდი რაოდენების შემთხვევები და ის საწოლები და რეანიმაციული დახმარებები მხოლოდ მძიმე ფორმით დაავადებულებს უნდა დაეთმოთ”, - მიიჩნევს გამოცემის კორესპონდენტთან საუბრისას ირაკლი ხმალაძე.

“ინფექციონისტი ალექსანდრე გოგინავა აცხადებს, რომ თუკი ინფიცირების მაჩვენებელი გარკვეული პერიოდის განმავლობაში ყოველდღიურად 1000-ს გადააჭარბებს ჩაკეტვის აუცილებლობა საჭირო გახდება, რადგან სახელმწიფოს რესურსები აღარ ეყოფა. მას უჭირს საუბარი, თუ რამდენად გამართლებულია სახელმწიფოს სტრატეგია, რომელიც შეზღუდვების დაწესებას მხოლოდ იმ შემთხვევაში გულისხმობს, როდესაც ექიმების, ტესტირების რესურსი და ჰოსპიტალური სექტორის რესურსი ინფიცირებულების მზარდ რაოდენობას ვერ აუვა. “ზუსტი განსაზღვრა რთულია, თუ როდის მიიღებს სახელმწიფო შეზღუდვების რადიკალურ ზომებს. რაც უფრო იზრდება დაინფიცირებულთა რიცხვი, სახელმწიფო რესურსს ზრდის, მეტი კლინიკა კეთდება კოვიდცენტრად და ა.შ., თუმცა ეს უსასრულოდ ვერ გაგრძელდება. “თუ ასეთი ტენდენციით წავედით, რომ დღის განვალობაში 1000-ზე მეტი შემთხვევა დაფიქსირდა და რესურსები საკმარისი თუ არ აღმოჩნდა, დაახლოებით 2-3 კვირაში შეიძლება ჩაკეტვა გარდაუვალი გახდეს და ჩვენ აღარ გვეყოს არც ადამიანური და არც სხვა ინფრასტრუქტურული რესურსი, რომ ყველა პაციენტს მიეწოდოს სრულფასოვანი სერვისები”, - თქვა გოგინავამ, რომლის აზრით, “უახლოეს კვირებში ვნახავთ, ვართ თუ არა კრიტიკულ ზღვარამდე მისულები”, - დასძენს გამოცემა.

“არ ვიცი ეს მიდგომა რამდენად სწორია, მაგრამ ერთ რამეს ვიტყვი. გარკვეულწილად რაღაც შეზღუდვები ნელ-ნელა უნდა ამოქმედდეს, რომ შედეგები იყოს დადებითი. თუნდაც ტრანსპორტში გარკვეული წესების დაცვა, თავშეყრის ადგილების მაქსიმალური შეზღუდვა, პირბადის ღია სივრცეში ტარების აუცილებლობა და ა.შ. ეს რეგულაციები უნდა ამოქმედდეს და არ უნდა დაველოდოთ ჯანდაცვის სისტემის კოლაფსს, რადგან მერე მოგვიწევს საყოველთაო ჩაკეტვა. ეს რომ არ მოხდეს, ვფიქრობ, იქამდე უნდა დაწესდეს შედარებით მსუბუქი შეზღუდვები. არის სხვა მიზეზებიც - როდესაც ჩვენს მეზობლად სულ მზარდი ახალი შემთხვევების რაოდენობა იყო, რასაკვირველია, ამან გავლენა მოახდინა ჩვენზეც და მოხდა ის, რომ ამ ეტაპზე საქართველოში ვირუსის უკონტროლო გადაცემა დაიწყო. ვართ აღმავალ პროცესში და რთული სათქმელია აქედან გამოსავალი რა იქნება. პირველ რიგში მოსახლეობამ უნდა დაიცვას რეკომენდაციები იმისათვის, რომ რაც შეიძლება შევამციროთ დაავადების გავრცელება და ასეე სახელმწიფოსგან გარკვეული რეგულაციები უნდა იქნეს შემოღებული”, - თვლის გამოცემის კორესპონდენტთან საუბრისას ალექსანდრე გოგინავა.

“ის, თუ რატომ არ შემოაქვს სახელმწიფოს რეგულაციები, ამას რამდენიმე სავარაუდო ფაქტორი განაპირობებს. ჩემი აზრით, ერთ-ერთია ეკონომიკური ფაქტორი. იმ ტიპის ჩაკეტვა, რაც იყო გაზაფხულზე, ძალიან ცუდ მდგომარეობაში ჩააგდებს სახელმწიფოს ეკონომიკას. მეორე ფაქტორია ის, რომ მსოფლიოში არსებული ტენდენციით აღმოჩნდა, რომ ამ დაავადებას არ აქვს სეზონურობა და ამიტომ სულ ჩაკეტილები ვერ ვიქნებით. ჩვენ გვქონდა უკვე იმის განცდა, რომ ზაფხულში ვირუსი აღარ გავრცელდება, თუმცა ეს ასე არ მოხდა. ამიტომ სულ ჩაკეტილი ვერ იქნება ქვეყანა და ამ ეტაპზე ამის საჭიროებს მე ვერ ვხედავ, რადგან ადრე თუ გვიან საზღვრები მაინც გაიხსნება და ვირუსს თავიდან ვერ ავიცილებთ. ასეთ ვითარებაში შესაძლებელია მხოლოდ წერტილოვანი რეკომენდაციების გაცემა, ასეთი რეგულაციები არის აუცილებელი და უნდა შემოიღოს სახელმწიფომ არა ძალიან მკაცრი, არამედ მიმართული კონკრეტული ცხელი ეპიდკერების ჩასაქრობად. ჩვენ ვირუსის შეჩერების ეტაპებს გრძელვადიანი პერსპექტივით უნდა მივუდგეთ - კი არ ჩავკეტოთ ქვეყანა, არამედ მოსახლეობამ უნდა აიღოს პასუხისმგებლობა დაიცვას საკუთარი თავი და მის გარშემო ადამიანები. ასევე სახელმწიფოს უნდა მოამზადოს კლინიკური სექტორი, რათა ყველა პაციენტმა მიიღოს ხარისხიანი სერვისები”, - დაასკვნის გოგინავა.

მამუკა ხაზარაძე - “პირებმა, რომლებიც წარსულში სისხლიან რეჟიმს ემსახურებოდნენ, ახალ მთავრობაში აღარ უნდა დაიკავონ საპასუხისმგებლო თანამდებობები”

“ხელისუფლება პანდემიის დაწყების დღიდან არაადეკვატურად იქცევა. შემზღუდავი რეგულაციების დაწესების გარდა, არაფერი გაუკეთებია. საერთაშორისო ვალები აიღო და უმისამართოდ დაარიგა. მიუხედავად იმისა, მსოფლიო მეორე ტალღის მოლოდინში იყო, არც სამუშაო ადგილების შესანარჩუნებლად გაატარა რაიმე ღონისძიება, არც მედპერსონალი გადაამზადა, ახალი ინფექციური კლინიკის აშენებას ვინ ჩივის, ძველიც არ გაარემონტა. მრჩება შთაბეჭდილება, რომ ხელისუფლება მიზანმიმართულად ქმნის ისეთ გარემოს, როგორიც აწყობს. მათი ტყუილების აღარავის სჯერა. წინასაარჩევნოდ მათ ხალხისთვის სათქმელი არაფერი აქვთ. ხომ ხედავთ, დებატებშიც არ მონაწილეობენ და რა უნდა ექნათ? ყურადღების გადასატანად შემოაგდეს ისეთი სენსიტიური თემა, როგორიც დავითგარეჯია, მეორე მხრივ კი ცდილობენ, ხალხი პანდემიით დაზაფრონ და არჩევნებზე რაც შეიძლება ცოტა ამომრჩეველი მივიდეს, თავიანთ მომხრეებს კი ადმინისტრაციული რესურსის გამოყენებით ისედაც მიიყვანენ”, - აცხადებს პარტიის “ლელო საქართველოსთვის” თავმჯდომარე მამუკა ხაზარაძე გაზეთ “კვირის პალიტრისთვის” მიცემულ ინტერვიუში, სათაურით “პირებმა, რომლებიც წარსულში სისხლიან რეჟიმს ემსახურებოდნენ, ახალ მთავრობაში აღარ უნდა დაიკავონ საპასუხისმგებლო თანამდებობები”.

“ჩვენ ჯერ კიდევ გაზაფხულზე შევთავაზეთ ხელისუფლებას საკრედიტო-საგარანტიო ფონდის შექმნა. ჩვენი ინიციატივა რომ გაეთვალისწინებინათ, ეს ფონდი უკვე ამუშავებული იქნებოდა და ახლა ასეთი კრიზისის წინაშე არ ვიდგებოდით. ახლაც ვამბობთ, რომ ეკონომიკის ამუშავების ერთადერთი გზა არის ყველა ვალდებულების რეფინანსირება ყველასთვის და არა მხოლოდ სელექციური ბიზნესებისთვის. მსოფლიოში არსებობს ამის პრეცედენტები და ჩვენც გვაქვს საამისო შიდა რესურსი. ჩვენ გვინდოდა სამი ფონდის შექმნა: პირველი, სამმილიარდიანი ფონდი, არა მარტო ეკონომიკის გადატვირთვის საშუალებას მოგვცემდა, არამედ ბიზნესებს სამუშაო ადგილების შენარჩუნების საშუალებასაც მისცემდა. დღეს საბანკო სექტორი უკვე ნახევარმილიონიან ზარალზეა წასული. თუ ეს პროცესი არ შეჩერდა, ძალიან ცუდ შედეგს მივიღებთ. რეფინანსირება ერთ-ერთი სწორი გამოსავალია, მაგრამ აზრი არა აქვს ამაზე ლაპარაკს, ხელისუფლება მაინც არაფერს გაითვალისწინებს. მსოფლიო ბანკმა გასულ კვირას გამოაქვეყნა მონაცემები, რომელთა მიხედვითაც, საქართველოში 160 000 კაცი სიღატაკის ზღვარს ქვემოთ არის და შესაძლოა მათი რიცხვი გაიზარდოს. მსოფლიო ბანკის, ევრობანკისა და იბიარდის მონაცემებით, საქართველოს ეკონომიკური ზრდის მაჩვენებელი 3,4%-ია. ქვეყნის კრიზისიდან გამოყვანა რომ მოახერხო, ეკონომიკური ზრდის ორნიშნა მაჩვენებელია საჭირო. ამის გაკეთება შესაძლებელია, მაგრამ ამას სჭირდება პროფესიონალების გუნდი და ეს შეგვიძლია ჩვენ”, - აღნიშნავს გამოცემის კორესპონდენტთან საუბრისას მამუკა ხაზარაძე.

“უნდა იცოდე, კრიზისი როგორ გადააქციო შესაძლებლობად. ჩვენ ეს ვიცით. გასაგებია, რომ კრიზისია მსოფლიოში, მაგრამ ადამიანებს ხომ არ შეუწყვეტიათ ჭამა, სოფლის მეურნეობის პროდუქტების მოყვანა, ტვირთების გადაზიდვა... ჩვენ პატარა ქვეყანა ვართ და ისეთი რეფორმების გატარება შეგვიძლია, რომ სწორედ ამ პანდემიის პირობებში გავხდეთ ეპიცენტრი ისეთი ინდუსტრიებისა, რომლებზეც ხალხის დიდ ნაწილს დღეს წარმოდგენაც არა აქვს. 3 წელიწადში ონლაინგაყიდვები მთელ მსოფლიოში 6,4 ტრილიონს მიაღწევს. გასაგებია, რომ ონლაინვაჭრობა იქნება, მაგრამ ტვირთებს მიტან-მოტანა, დასაწყობება ხომ სჭირდება? ჩვენ ღმერთმა უნიკალური ადგილმდებარეობა მოგვცა, აზიისა და ევროპის ეპიცენტრში ვართ, ზღვა, თევზი გვაქვს... ამ დალოცვილ ქვეყანაში გვაქვს უამრავი შესაძლებლობა, გვყავს უამრავი ინტელექტუალი, რომლებიც დღეს ქვეყნის გარეთ არიან. თუ ამ რესურსის შეგროვება არ დავიწყეთ და გარდავქმენით შესაძლებლობებად, სულ მაჩანჩალები ვიქნებით და ვივიშვიშებთ, მსოფლიოში კრიზისია და ჩვენც კრიზისში უნდა ვიყოთო. ეს მცდარი მიდგომაა. ჩვენ შეგვიძლია მსოფლიო კრიზისში გარღვევა მოვახდინოთ. “ოცნებას” საბჭოური აზროვნება აქვს და იმიტომ ვერ პოულობს გამოსავალს”, - განაგრძობს რესპონდენტი.

“როდესაც რეგიონში ომია და შენ არჩევნების მთავარ თემად გარეჯი შემოგაქვს, ეს ნიშნავს, რომ ქვეყანა არ გიყვარს და შენი უნიათობის დასაფარავად ასეთი მნიშვნელოვანი თემის გამოყენებასაც არ ერიდები. ხომ ცხადია, ეს თემა წინასაარჩევნოდ გამოიყენეს. ამდენი ხანია თვალყურს ვადევნებ გარეჯის ამბავს და სიმართლე გითხრათ, ვერ დავინახე საბაბი, რის გამოც ის ორი კარტოგრაფი დაიჭირეს. რას ჰქვია, რუკა სახლში დამალეს? სად იყვნენ მინისტრები, ისტორიკოსები, შესაბამისი სამსახურის წარმომადგენლები, ეძინათ? მთელი სახელმწიფო ამ ორი კარტოგრაფის კეთილსინდისიერებაზე იყო დამოკიდებული? გადააგორე არჩევნები, დაელოდე ყარაბაღის ომის დასრულებას და მერე წამოსწიე ასეთი სენსიტიური და მნიშვნელოვანი თემა. რუკა დაიკარგა თუ ვიღაცამ დამალა, მერე გაარკვიე. ამას სხვა ვითარებაში და სხვანაირი გამოძიება სჭირდება. ძალიან სულელურ სიტუაციაში ჩაიგდეს თავიც და ქვეყანაც”, - მიიჩნევს “ლელო საქართველოსთვის” თავმჯდომარე.

“პირებმა, რომლებიც წარსულში სისხლიან რეჟიმს ემსახურებოდნენ, ახალ მთავრობაში აღარ უნდა დაიკავონ საპასუხისმგებლო თანამდებობები. არსებობს მორალური და სამართლებრივი პასუხისმგებლობა. პოლიტიკური რევანში კი არა, სისტემის ძირფესვიანი ცვლილებაა საჭირო და რაც შეიძლება სწრაფად. სამართალდამცავ ორგანოებს, სკოლას, საბავშვო ბაღს პოლიტიკური წნეხი უნდა მოეხსნას. თანამდებობებზე უნდა დაინიშნონ პროფესიონალიზმისა და არა პოლიტიკური კუთვნილების ნიშნით”, - დასძენს ჯაფარიძე და შეკითხვაზე - “არჩევნებამდე ორიოდე კვირა დარჩა. რა განწყობა და მოლოდინი გაქვთ?” - პასუხობს:

“ეჭვიც არ მეპარება, რომ "ლელო" იქნება მომავალ კოალიციურ მთავრობაში წარმმართველი ძალა. ყველა თანამდებობაზე წარვადგენთ დამოუკიდებელ და პროფესიონალ ადამიანებს, რათა ერთხელ და სამუდამოდ შეიქმნას ისეთი გუნდი, რომელიც არის პატრიოტი, აქვს კონკრეტული გეგმა, რათა ქვეყანა ძალიან სწრაფად გამოვიყვანოთ გაჭირვებიდან”.

რამდენად გამართლებულია ეპიდემიის დროს სააკაშვილის მიერ ახალი აქციების დაანონსება

“ეს განცხადება სრულიად ჩვეულებრივად მივიღე იმ მხრივ, რომ რაღაცნაირად შთამბეჭდავი აქცია იყო. სააკაშვილი ამით სარგებლობს და დამატებითი მუხტის გაღვივებას ცდილობს. მთავარია ეს კომუნიკაცია არ “გადახურდეს” და რაღაც მომენტში უკურეაქცია არ გამოიწვიოს”, - ასე აფასებს “რეზონანსთან” ანალიტიკოსი და ჟურნალისტი არჩილ გამზარდია საქართველოს ექს-პრეზიდენტ მიხეილ სააკაშვილის მიერ ბათუმის აქციის შემდგომ გაკეთებულ განცხადებას. სააკაშვილი აცხადებს, რომ “შეკრება ბათუმში იყო ძალიან დიდი, ძალიან ამაღელვებელი დემონსტრაცია”; ამბობს, რომ “ნაციონალური მოძრაობა” და კოალიცია “ძალა ერთობაშია” შემდგომი მასობრივი მობილიზაციისთვის მზადაა და კორონავირუსის პირობებში დაანონსებულ შეკრებებს კორონავირუსისგან ყველა საჭირო დამცავ საშუალებებით უზრუნველყოფს”. როგორც გამზარდია ამბობს, იმ პირობებში, როცა წინასაარჩევნო შეკრებები ნებადართულია, პარტიას უკანონო არაფერი გაუკეთებია”, - წერს გაზეთი “რეზონანსი” სტატიაში, სათაურით რამდენად გამართლებულია ეპიდემიის დროს სააკაშვილის მიერ ახალი აქციების დაანონსება.

“ეს განცხადება სრულიად ჩვეულებრივად მივიღე იმ მხრივ, რომ რაღაცნაირად შთამბეჭდავი აქცია იყო. სააკაშვილი ამით სარგებლობს და დამატებითი მუხტის გაღვივებას ცდილობს, მთავარია ეს კომუნიკაცია არ “გადახურდეს” და რაღაც მომენტში უკურეაქცია არ გამოიწვიოს, თორე სხვა მხრივ, ბუნებრივია, ის შეეცდება, რომ რაც შეიძლება მეტი მუხტი შეიტანოს. მან კარგად იცის ქართველი ამომრჩევლის ის ბუნება, რომ ხშირად ამომრჩეველი ყურადღებას აქცევს და გადადის ხოლმე პოტენციური გამარჯვებულის, ან გამარჯვებულის მხარეს და სააკაშვილი ამიტომაც ცდილობს აჩვენოს, რომ მე ხვალინდელი დღე ვარ, ანუ არჩევნებში მე გავიმარჯვებო და ხელოვნური მხარდაჭერაც მიიღოს. დანარჩენ შემთხვევაში უკანონო არაფერი გაუკეთებიათ. საარჩევნო კამპანიაში შეკრებები ნებადართულია, შესაბამისად, “ნაციონალურ მოძრაობამაც” ამით ისარგებლა, თუ დანარჩენი მცირე სამოქალაქო გადაცდომები იყო, ამ შემთხვევაში სახელმწიფოს უნდა ემოქმედა და დაეჯარიმებინა ადამიანები. მაგრამ ამ მხრივ ხელისუფლებამ მხოლოდ პროპაგანდისტული ნეგატივი არჩია”, - აცხადებს გამოცემის კორესპონდენტთან საუბრისას არჩილ გამზარდია.

“მართალი გითხრათ, ყველა საარჩევნო კამპანია თითქმის მსგავს პირობებშია, სადღაც ორას-ორასი ადამიანი იკრიბება და დღეში რამდენჯერმე, თქვენ წარმოიდგინეთ იგივე ხელისუფლების კანდიდატები დღეში რამდენ ადგილზე დადიან და ასეთი შეკრებები ყველგანაა. ფოტოებსაც კი ვხედავთ - არც პირბადის ფაქტორი და არც სოციალური დისტანცია არ არსებობს, პლიუს კიდევ ტრანსპორტი გინდა თუ რა გინდა... სად ხდება ამ ყველაფრის დაცვის შესაძლებლობა? ჩვენ რომ ვთქვათ, რომ სააკაშვილის განცხადება მიუღებელია, იმიტომ, რომ პანდემიის პირობებში შეკრება როგორ შეიძლებაო, მაშინ ყველა სხვა დანარჩენიც უნდა ვიგულისხმოთ. თუკი გარკვეულ წესებს ყველა დაიცავს, მაშინ ვინც არ დაიცავს კრიტიკული შეფასება იმ ერთზე გავაკეთოთ, მაგრამ ობიექტურები რომ ვიყოთ, კრიტიკული შეფასება ყველას მიმართ უნდა გამოვიყენოთ და მათ შორის სახელისუფლებო პარტიის მიმართაც”, - დასძენს გამზარდია.

პაატა იმნაძე - “თვითონ უნდა მიხედო თავს - ნიღაბი გაიკეთო, დისტანცია დაიცვა და იმუშაო”

“რამდენი ხანია, ვიხვეწებით, ყველგან ნიღაბი და დისტანცია გამოიყენეთო, თუმცა ყველამ ნახა, ბათუმში რაც ხდებოდა. შედეგს დაახლოებით 10 დღეში დავინახავთ... რატომ არ გვქონდა პირველი ტალღა? იმიტომ, რომ ყველაფერი გაკეთდა - აკრძალვები იყო დროული, ხალხიც ემორჩილებოდა ამას. მაშინ, როცა არავინ არაფერი იცოდა ამ ვირუსის შესახებ. ეს ხომ გავაკეთეთ? თან - ძალიან კარგად, მაგრამ ასეთი ღონისძიებები მთელი ცხოვრება ხომ ვერ გაგრძელდება? ქვეყანა ხომ უნდა ამუშავდეს? მთელმა მსოფლიომ ისწავლა, რომ ნიღაბი და დისტანცია კარგად იცავს და სხვა შეზღუდვები აღარ არის აუცილებელი. თვითონ უნდა მიხედო თავს - ნიღაბი გაიკეთო, დისტანცია დაიცვა და იმუშაო”, - ~ - აცხადებს დაავადებათა კონტროლის ცენტრის ხელმძღვანელის მოადგილე პაატა იმნაძე გაზეთ “კვირის პალიტრისთვის” მიცემულ ინტერვიუში, სათაურით “თვითონ უნდა მიხედო თავს - ნიღაბი გაიკეთო, დისტანცია დაიცვა და იმუშაო” / “მთელ მსოფლიოში მეორე ტალღა აქვთ, ჩვენ კი, პრაქტიკულად - პირველი”.

“ზოგ ქვეყანაში ბრუნდება შეზღუდვები, თუმცა ცდილობენ, ეს შეზღუდვები ისეთი იყოს, რომ ეკონომიკა არ დაინგრეს. ჩვენც ამ ღონისძიებებს მივყვებით, ანუ ვცდილობთ, წერტილოვანი შეზღუდვებით გავიდეთ ფონს ისე, რომ თან ქვეყანა განვითარდეს. ეს ჩვენც იმავე შედეგს გვაძლევს, რასაც მთელ მსოფლიოს, ოღონდ იმათ მეორე ტალღა აქვთ, ჩვენ კი, პრაქტიკულად - პირველი. რაც შეეხება ტესტებს, ევროპაში მერამდენე დღეს იგებენ ტესტის პასუხს? ძალიან ადვილი სანახავია, მილიონ მოსახლეზე სად რამდენი ტესტი ტარდება. ეს მონაცემები ინტერნეტშია და ყველას შეუძლია ნახოს. ნახონ, საქართველო ამ მონაცემებით რომელ რიგშია, რამდენ განვითარებულ ევროპულ ქვეყანაზე მეტ ტესტს ვაკეთებთ მილიონ მოსახლეზე! კარგი ახლა, ნუ მოგვთხოვენ, რომ ყველაფერში ვაჯობოთ მსოფლიოს... ძალიან ძნელია გარდაცვალებაზე საუბარი, მაგრამ იქაც ნახონ, მილიონ მოსახლეზე რამდენია გარდაცვლილი. ხუთჯერ, ათჯერ, ოცჯერ ნაკლებია ჩვენთან”, - აღნიშნავს გამოცემის კორესპონდენტთან საუბრისას პაატა იმნაძე.

“ვატაროთ ნიღბები და დავიცვათ დისტანცია. ჩემზე უკეთესად ენტონი ფაუჩიმ თქვა, ხუთი პრინციპი ჩამოთვალა: ნიღაბი, დისტანცია, ხალხმრავალი შეკრებისთვის თავის არიდება, მცირე შეკრებები, რომელსაც ვერ ავცდებით, ოღონდ - ღია სივრცეში, და ხელების ჰიგიენა. ასე შეგვიძლია კორონავირუსს ვებრძოლოთ... ზოგი ამბობს, რომ საქართველოში გამოსავალი ისევ კარანტინის შემოღებაა. ყველას თავისი აზრი აქვს, მაგრამ საქართველო აკეთებს იმას, რაც ამ ეტაპზე ყველაზე უფრო მისაღებია. მთავრობაში ყველა გადაწყვეტილება მიიღება ჩვენი რეკომენდაციების სრულად გათვალისწინებით. რაც შეეხება ვაქცინას, ტრამპსაც აქვს იმედი, რომ წლის ბოლოს ვაქცინა იქნება. მოდი, რეალისტები ვიყოთ - არა მგონია, გამოცდილი და ხელმისაწვდომი ვაქცინა ზამთრის ბოლომდე ან გაზაფხულამდე იყოს ჩვენთან”, - განაგრძობს რესპონდენტი და შეკითხვაზე - “განკურნების შემდგომ რა კვალს ტოვებს “კოვიდ-19” ორგანიზმში? - პასუხობს:

“ამაზე უკვე ბევრი კვლევაა ჩატარებული. აღმოჩნდა, რომ ვირუსმა შეიძლება ორგანიზმის ბევრ სისტემაზე იმოქმედოს. მათაც კი, ვინც მსუბუქად გადაიტანა დაავადება, შესაძლებელია, რაღაც პერიოდის განმავლობაში ზოგიერთი ორგანოს პრობლემები დარჩეს. ხშირია გემოს დაკარგვა. ზოგს ცოტა ხნით, ზოგს კი უფრო დიდი ხნით უგრძელდება”.

“რაც შეება არჩევნებს - თუ ქუჩაში დავდივართ, სამსახურში, არჩევნებზე რატომ არ უნდა მივიდეთ? მით უმეტეს, რომ ნიღაბი და დისტანცია ყველგან ერთნაირად ეფექტიანია. მთავარია, ჩვენ ნიღაბი გამოვიყენოთ და დისტანცია დავიცვათ. პანიკა არასდროს არის სასარგებლო, იმიტომ, რომ დიდი მნიშვნელობა აქვს, ნერვული სისტემა გაწონასწორებული გვქონდეს. პანიკა ორგანიზმისათვის ძალიან სახიფათოა. და ვისაც ვირუსის არ სჯერა, რა უნდა ვუთხრა? რაღაცას რომ ვიტყვი, ამბობენ, გვაშინებსო. მე არავის ვაშინებ. რა ვუყოთ, ვისაც არ სჯერა, ოღონდ სხვას ნუ შეუქმნის საფრთხეს და თვითონ რაც უნდა, ის ქნას”, - დასძენს იმნაძე.

ლევან დოლიძე - ახლა განსაკუთრებით მნიშვნელოვანია აქტიურობა და ყველა იმ ინიციატიის განხილვა, რაც ჩვენი უსაფრთხოების გაძლიერების ახალ და ეფექტიან მექანიზმებს შექმნის
ქართული პრესის მიმოხილვა 26.11.2020
ზაალ ანჯაფარიძე - შესაძლოა, დასავლეთს არ ეპიტნავებოდეს „ქართული ოცნება,“ მაგრამ მან დაამტკიცა, რომ შეუძლია პარტნიორობაც და სტაბილურობის უზრუნველყოფაც, რაც დასავლეთისთვის პრიორიტეტულია
კოვიდ-19 პანდემიის ფონზე თანამედროვე საერთაშორისო სამოქალაქო ავიაციის სამართლებრივი პრობლემები და პერსპექტივები
ახალი Economy და Isolated კატეგორიები Bolt-ის აპლიკაციაში
ექსპოჯორჯია აგრო ექსპორტის ფორუმს ონლაინ, B2B ფორმატში გამართავს
„9 შავი პარასკევი“ ექსტრაზე Mastercard-ისგან
კრედო ბანკმა ევროპის განვითარების წამყვანი ფინანსური ინსტიტუტის - PROPARCO-სგან 5 მილიონი დოლარის ფინანსური რესურსი მოიზიდა
ლიბერთის აქცია #გულით პედაგოგებისთვის გრძელდება
„ვისოლის“ თვითმომსახურების სადგურზე „სმარტის“ სუპერმარკეტი და „დანკინის” ევროპაში პირველი Drive-Thru რესტორანი გაიხსნა
ათეა გენდერული ძალადობის წინააღმდეგ 16-დღიან გლობალურ კამპანიას უერთდება