სამეგრელო-ზემო სვანეთის მხარის რწმუნებულის მოვალეობის შემსრულებლის, მალხაზ თორიას განცხადებით, ზუგდიდში, „საქართველოს ბანკის" შენობაში მყოფმა მოქალაქეების ნაწილმა შენობა, ბანკის მეოთხე სართულიდან სახანძრო კიბის საშუალებით დატოვა, რამდენიმე კი თავდამსხმელმა გაათავისუფლა.
როგორც მან „ინტერპრესნიუსს" განუცხადა, „საქართველოს ბანკის" ერთ-ერთ ფილიალში, შეჭრილია პიროვნება, რომელსაც მძევლად ჰყავს აყვანილი როგორც ბანკის კლიენტები, ასევე თანამშრომლები.
„შენობა არის 3- სართულიანი, მეოთხე სართულზე აქვს მოედანი. მაშინ, როცა შეიჭრა თავდამსხმელი ბანკში, რა თქმა უნდა, ოთხი სართულის გაკონტროლება ვერ მოახერხა, აქედან გამომდინარე, მეოთხე სართულის სახურავიდან სახანძრო კიბით ხალხის გარკვეული ნაწილი ჩამოვიდა. თვითონ თავდამსხმელმა გაათავისუფლა რამდენიმე პირი, ისინი არიან სამშვიდობოს. რაც შეეხება მოთხოვნებს, სპეცოპერაცია მიმდინარეობს და ამაზე შსს-ს გააკეთებს კომენტარს", -განაცხადა მალხაზ თორიამ.
შეგახსენებთ, შსს-მ განცხადება გაავრცელა და აღნიშნა, რომ მომხდარ ფაქტზე გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო. უწყების ცნობით, ბანკში შეიარაღებული პირის შეჭრის შესახებ შეტყობინება შინაგან საქმეთა სამინისტროში დაახლოებით 14:21 საათზე შევიდა. პოლიციის თანამშრომლებმა, მყისიერი რეაგირების რეჟიმში შემოსაზღვრეს შემთხვევის ადგილის მიმდებარე ტერიტორია და დაიწყო დამნაშავის გაუვნებელყოფის ოპერაცია.