„რამდენიმე რეგიონში უკვე ვიყავით, მოსახლეობას შევხვდით, ინდივიდების პრობლემებს გავეცანით. ჩვენი პროგრამა იძლევა იმის შესაძლებლობას, რომ ფუნდამენტური პრობლემები გადავჭრათ და თუ ამის შესაძლებლობა მოგვეცა, გეგმას აუცილებლად განვაცხორციელებთ.“ - ამის შესახებ პოლიტიკური მოძრაობა „სოციალური სამართლიანობისთვის“ ლიდერმა, გიორგი შერვაშიძემ განაცხადა.

მისი თქმით, პარტია უკვე შეხვდა თბილისის, რუსთავის, გორის და დმანისის მოსახლეობას, მოინახულა კახეთიც, უახლოეს დღეებში კი ქუთაისს, ბათუმსა და ზუგდიდსაც ესტუმრებიან.

„ჩვენ ის პარტია ვართ, რომელსაც ვერც ერთი მთავრობა კომპრომატების ენით ვერ დაელაპარაკება. ჩვენ ვართ ახალი სახეები, ახალი ძალა და ახალი ენერგია. ჩვენი გასაკეთებელი ჩვენ, ყველამ უნდა გავაკეთოთ. ამიტომ არიან ჩვენ გვერდით ისეთი ადამიანები, როგორებიც არიან, მაგალითად, ლეგენდარული ფეხბურთელები გოჩა მაჩაიძე და მანუჩარ მაჩაიძე, რომლებმაც ჩვენი ქვეყნის სახელი მსოფლიოს გააცნეს. ჩვენ ის ხალხი ვართ, ვინც შევძლებთ, არსებული მდგომარეობა ხალხის მხარდაჭერით შევცვალოთ და ქვეყანა გადავარჩინოთ”, - აღნიშნა გიორგი შერვაშიძემ.

„პოლიტიკური მოძრაობის “სოციალური სამართლიანობისთვის“ ლიდერები რეგიონებში მოსახლეობასთან შეხვედრას განაგრძობენ. 22 ოქტომბერს შეხვედრა გაიმართება ქუთაისში. შეხვედრები დასრულდება 24 ოქტომბერს ზუგდიდში.

ინფორმაციას „სოციალური სამართლიანობისთვის“ პრესსამსახური ავრცელებს.