„ნაციონალური მოძრაობის" წარმომადგენლის, ანი წითლიძის განცხადებით, კონკრეტული პირები „ქართული ოცნების" დავალებით ზუგდიდის საარჩევნო უბნებზე ე.წ. კარუსელის დატრიალებას შეეცდებიან. ამის შესახებ მან ბრიფინგზე განაცხადა.

„ეს ადამიანები არიან კაზინო „ვეგასის" წარმომადგენლები, რომელთა ხელმძღვანელი არის გია სალია. ის „ქართული ოცნებიდანაა". უბნებზე გაფრთხილებულები არიან „ქართული ოცნების" კომისიის წევრები, რომ ამ ადამიანებს ხელზე ექნებათ სპეციალური ბეჭედი და სამაჯური, რითაც მათ შეუძლიათ ისინი იცნონ და უბნებზე გაატარონ. ჩემი ინფორმაციით, ეს პირები უკვე შეკრებილები არიან იუსტიციის სახლის უკან, ზუგდიდში. მათ დავალებები აქვთ, რომ კონკრეტულად ე.წ კარუსელზე შევიდნენ შემდეგ უბნებზე: ზუგდიდის მე-20 საარჩევნო უბანი; 36-ე და 37-ე საარჩევნო უბნები კოლხიდა-ახალსოფელი; მე-18 უბანი დემირიას ქუჩა, ფაიფური; 21-ე უბანი მე-7 საჯარო სკოლა; მე-4 სკოლა მე-9 საარჩევნო უბანი. 87-ე უბანი მე-7 საჯარო სკოლა; 57-ე უბანი სოფელი ოდიში; 106-ე უბანი, 77-ე უბანი ჭითაწყარი; მე-6 უბანი მე-11 სკოლა. ამის პარალელურად, ჩვენ უბნებიდან ვიღებთ ინფორმაციას, რომ მასობრივად ყველა ჩვენს წარმომადგენელს შიგნით უბანზე გადაღებასთან დაკავშირებით პრობლემა შეექმნა. ჩვენ გვაქვს ე.წ. კარუსელის ამომცნობი სპეციალური პროგრამა, რითაც შესაძლებელია, რომ უბანზე ორჯერ შესული პირის იდენტიფიცირება მოხდეს", - განაცხადა წითლიძემ.