დავით ბერძენიშვილი - მე არ ვარ განწყობილი, რომ ვადამდელი საპარლამენტო არჩევნები მოხერხდება

არ ვამბობ, რომ პარლამენტში შეუსვლელობა არის კოშმარი ან პარლამენტში შესვლა არის კოშმარი, ან რომ საერთოდ რომელიმე არის გადარჩენა. საქართველო არ გაბრწყინდება არც შესვლით და არც შეუსვლელობით, - ამის შესახებ „რესპუბლიკური პარტიის“ ერთ-ერთმა ლიდერმა, დავით ბერძენიშვილმა „პალიტრანიუსის“ გადაცემა „ნიუსრუმში“ განაცხადა.

მისივე თქმით, ამ შემთხვევაში ბრძოლის რამდენიმე გზა არსებობს, თუმცა ეს გზები ერთმანეთთან თანხვედრაში უნდა მოდიოდეს.

„მე პოლიტიკურ პლურალიზმს ვგულშემატკივრობ, ამიტომ ვამბობ, რომ თუ ვინმეს გაქვთ იმის თქმის ილუზია, რომ არ შევდივართ პარლამენტში, შესაბამისად, მეორე ტურში არ მივიღებთ მონაწილეობას და ამასთანავე, სამართლებრივი გზებით იბრძოლებთ და თუ რამე გამოგივათ ეს კარგი იქნება - ეს ნამდვილად ილუზიაა ან ეს არის წინასწარ გაცხადებული არაგულწრფელი ამბები. ან ერთი ან მეორე! მე არ ვამბობ, რომ ერთი გზა არის პრიორიტეტული და მეორეს არავითარი მნიშვნელობა არ აქვს, მაგრამ უნდა ვიცოდეთ, რომ თუ პარლამენტის შესვლაზე გადის გზა, მაშინ ორივე გზა უნდა იყოს ერთმანეთთან სამართლებრივი და პოლიტიკური, საინფორმაციო უზრუნველყოფით. მაგრამ თუ პარლამენტში შესვლაზე არ გადის გზა, თუ წამყვანი ოპოზიციური ძალა იტყვის, რომ არ შედის პარლამენტში და ისინი, ვინც „ნაციონალური მოძრაობის“ წევრები არ არიან, მაგალითად, ზურა ჯაფარიძე, ელენე ხოშტარია და შალვა შავგულიძე იტყვიან, რომ აგრძელებენ ბრძოლას მეორე ტურში, ბუნებრივია, რომ „ნაციონალური მოძრაობის“ ამომრჩევლის მობილიზება ამ სამი ოლქისთვის არ იქნება და მოტივაცია არ ექნება ხალხს,“- განაცხადა დავით ბერძენიშვილმა.

მისივე განმარტებით, დიდი ალბათობით, ვადამდელი საპარლამენტო არჩევნების ჩატარება არ მოხერხდება და ამ პირობებში იმის თქმა, რომ „თუ ყველაფერს ვერ ვიგებ, არაფერი მინდა, სწორი არ არის“.

„ვადამდელ არჩევნებს, თუ გამოვიდა, ხომ კარგი, მაგრამ დიდი იმედი ამის არ გვაქვს და სინამდვილეში ვიწყებთ მზადებას თვითმმართველობის არჩევნებისთვის. შეიძლება ვამბობთ ვადამდელ არჩევნებს და ვემზადებით თვითმმართველობისთვის, პირველად ვაჟღერებ მე ამას. ჩვენთვის ახლა მთავარი ორიენტირი სწორედ, თვითმმართველობის არჩევნები. თბილისი მოსაგებია, როცა ვერ იგებ ყველაფერს, უნდა მოიგო იქ, სადაც შეგიძლია. ყველაფერი თუ ვერ მოვიგეთ არაფერი არ გვინდა, ამაზე საუბარი სწორი არ არის,“ - განაცხადა ბერძენიშვილმა და დასძინა: „მე არ ვარ განწყობილი, რომ ვადამდელი საპარლამენტო არჩევნები მოხერხდება“.

იხილეთ ვიდეო:

ეკატერინე ციმაკურიძე - განსაკუთრებული პრობლემაა ხელისუფლების მცდელობები თავი აარიდოს 19 აპრილის შეთანხმების ისე შესრულებას, როგორც ეს თავად ამ შეთანხმებითაა ნაგულისხმევი
ქართული პრესის მიმოხილვა 24.06.2021
სტეპან გრიგორიანი - ფაშინიანმა არჩევნები იმის გამო მოიგო, რომ სომეხმა ხალხმა ყარაბაღის ომში დამარცხება მას არ დაუკავშირა
„მაკდონალდსის“ ინვესტიციით საქართველოში პურ-ფუნთუშეულის საწარმო „ბრედფილდი“ იხსნება
ჭარბი წონა მსოფლიოში არა მხოლოდ პრობლემა,  დიდი ხანია, პანდემიაა (R)
"თბილისის ბალნეოლოგიურ კურორტში“ კონფერენცია „კურორტოლოგიის როლი მედიცინაში“ გაიმართა