საქართველოს ვიცე-პრემიერის მაია ცქიტიშვილის განცხადებით, აქციები დამატებითი შესაძლებლობაა ვირუსის გავრცელებისთვის და დიდია ალბათობა, რომ შემდეგი კვირების განმავლობაში ინფიცირების რაოდენობა მნიშვნელოვანად გაიზარდოს.

როგორც ვიცე-პრემიერმა მთავრობის ადმინისტრაციაში გამართულ ბრიფინგზე განაცხადა, აქციებზე პირბადის ტარების წესი დაცული არაა და ეს დამატებით საფრთხეს ქმნის.

„აქციები არის დადებითი მხარე ვირუსისთვის, დამატებითი შესაძლებლობაა ვირუსისთვის, რომ გავრცელდეს. როდესაც ჩვენ ვსაუბრობთ ასეთი ტიპის აქტზე, სადაც დამატებითი ემოციები ჭარბობს, არაა დაცული პირბადის ტარების წესი, არაა პირბადე სწორად გამოყენებული, ეს ყველაფერი არის დამატებითი საფრთხე. აჭარაში გახსოვთ აქცია, რომლის შემდეგაც აჭარაში მოიმატა შემთხვევებმა. ვნახეთ ძალიან აქტიური წინასაარჩევნო პროცესი. არ ვგულისხმობს უშუალოდ არჩევნების დღეს, საარჩევნო ყუთებთან ხმის დაფიქსირებას, არამედ მოძრაობას, აქციებს, რომელიც მანამდეც იყო, უკვე ვხედავთ ამის გავლენას ამ კვირის განმავლობაში და დიდია ალბათობა, რომ შემდეგი კვირების განმავლობაში მნიშვნელოვანი ზრდა გვექნება“,- განაცხადა ცქიტიშვილმა.