BBC - ერაყში მიგრანტთა ბანაკების დახურვის გამო შესაძლოა 100 000 ადამიანი უსახლკაროდ დარჩეს
ერაყში მიგრანტთა ბანაკების დახურვის გამო შესაძლოა 100 000 ადამიანი უსახლკაროდ დარჩეს, - ამ ინფორმაციას BBC ნორვეგიის ლტოლვილთა საბჭოზე დაყრდნობით ავრცელებს. მათი თქმით, ლტოლვილთა ბანაკები ერაყის 7 პროვინციაში გაფრთხილების გარეშე იხურება და მათში მცხოვრები ადამიანებისთვის ალტერნატიული სივრცის გამოყოფა დაგეგმილი არაა.
ერაყის ხელისუფლება აცხადებს, რომ „ისლამური სახელმწიფო“ ქვეყნის ტერიტორიიდან განდევნილია და მიგრანტთა ბანაკის მცხოვრებლებს უკვე შეუძლიათ საკუთარ სახლებში დაბრუნდნენ. მიგრანტები კი აცხადებენ, რომ მათი სახლები სრულიად განადგურებულია და უკან დაბრუნება არ შეუძლიათ.
მიგრაციის საერთაშორისო ორგანიზაციის ინფორმაციით, „ისლამური სახელმწიფოს“ დამარცხების შემდეგ ერაყის სხვადასხვა ტერიტორიაზე 4.7 მილიონზე მეტი ადამიანი დაბრუნდა.
