ისნის საოლქო საარჩევნო კომისიის თავმჯდომარის, თედორე გობეჯიშვილის გარდაცვალების ფაქტთან დაკავშირებით დაკავებულებს, აკაკი ხუსკივაძესა და აკაკი კობალაძეს აღკვეთის ღონისძიების სახით პატრობა შეეფარდათ.

აღნიშნული გადაწყვეტილება თბილისის საქალაქო სასამათლოს მოსამართლემ არსენ კალატოზიშვილმა მიიღო.

დღევანდელ სასამართლო პროცესზე ბრალდების მხარე დაკავებულებისთვის პატიმრობის შეფარდებას ითხოვდა, დაცვის მხარე კი სასამართლოს ალტერნატივის სახით გირაოს სთავაზობდა, რომლის ოდენობის განსაზღვრაც სასამართლოს მიანდო.

ხუსკივაძესა და კობალაძეს ბრალი ოფიციალურად დღეს წაუყენეს.

პროკურატურამ აკაკი კობალაძეს ბრალდება საქართველოს სისხლის სამართლის კოდექსის 339-ე მუხლის 1 ნაწილით, 150-ე მუხლის მე-2 ნაწილის „ბ“ ქვეპუნქტით, 151-ე მუხლის მე-2 ნაწილის „ა“ ქვეპუნქტით და 236-ე მუხლის მე-3 ნაწილით, ხოლო აკაკი ხუსკივაძეს საქართველოს სისხლის სამართლის კოდექსის 339-ე მუხლის 1 ნაწილით, 150-ე მუხლის მე-2 ნაწილის „ბ“ ქვეპუნქტით, 151-ე მუხლის მე-2 ნაწილის „ა“ ქვეპუნქტით წარუდგინა, რაც თედორე გობეჯიშვილის მიმართ ჯგუფურად განხორციელებულ იძულებას, მუქარას და ქრთამის მიცემას, ასევე, საბრძოლო მასალის მართლსაწინააღმდეგო შეძენასა და შენახვას გულისხმობს.